【小心！】31名幼童患腦炎死亡 疑因荔枝中毒

印度衛生部門官員表示，喺過去10日，印度北部最少有31名小朋友懷疑因為進食荔枝後中毒，罹患腦炎而喪命。

印度官員指，上述31名小朋友都出現急性腦炎症候群（Acute Encephalitis Syndrome, AES）嘅症狀，而大部分更有出現血糖驟降情況。31名小朋友分別嚟自比哈省（Bihar）墨沙發坡縣（Muzaffarpur）嘅兩間醫院。而墨沙發坡縣正正係以盛產荔枝而聞名。另外亦有不少於40名小朋友因出現類似症狀而入住加護病房，接受治療。

Photo from Mamidaily

當地衛生部門已經發出通告，呼籲市民如果氣溫超過攝氏40度，就必須要多加注意小朋友嘅健康狀況。其實墨沙發坡縣以及鄰近地區，喺每年夏季，適逢荔枝盛產嘅期間都會爆發同樣嘅腦炎疫情，當地人稱之為Chamki Bukhar。而2014年更是疫情最嚴重嘅一年，有成150人死亡。

過往亦有科學家發現，荔枝含有兩種天然化學物質hypoglycin A（次甘氨酸甲） 及MCPG（亞甲環丙基甘氨酸），而且喺未成熟嘅荔枝內含量更高，會抑制人體產生葡萄糖，令人出現抽搐、昏迷、甚至死亡，幼童更加係高危一族。

Photo from Mamidaily

而香港食物安全中心過去亦曾指出，內地及印度均為盛產荔枝嘅地方，不過就曾發生多宗進食荔枝後，出現低血糖嘅個案，輕則會頭暈噁心、腹痛腹瀉，嚴重者會抽搐、血壓下降，甚至危有生命危險。

Text：Mami Editorial