「死亡捉迷藏」 父母痛失一對兒子

捉迷藏係好多人都鍾意玩嘅小遊戲，小朋友為咗唔畀人捉，匿埋嘅地方好多時真係估佢哋唔到。不過當仔女玩緊同類遊戲嘅時候，父母應該多啲留意仔女嘅去向，事關近日喺靠近俄羅斯嘅中亞國家吉爾吉斯發生一宗慘劇，令一對父母痛失兩個兒子！

Photo from Mamidaily

上星期一（6月3日）中午大約12點時，有一對父母發現兩個分別4歲同6歲嘅囝囝唔見咗好耐，心急如焚嘅佢哋馬上四圍搵寶貝仔。經過超過5小時嘅搜索，呢對父母最後喺屋企後園嘅舊雪櫃入面搵返佢哋。兩個小朋友因空氣不流通，而陷入昏迷狀態，父母馬上為佢哋進行急救，可惜已經太遲。

兩個男童匿咗入雪櫃後，閂埋門後就無法再打開。就算佢哋點樣大聲呼救、拍打雪櫃都難以引起注意。父母雖然最後搵得返佢哋，可惜為時已晚。

Photo from Mamidaily

畀小朋友自己玩嘅時候，各位父母一定一定要時刻掌握仔女嘅行蹤，有時間最好梗係陪佢哋一齊玩，防止悲劇發生。

Text：Mami Editorial