BB愈嚟愈曳 點教先有效？

望住BB一日大過一日，除咗好唔捨得之外，亦愈嚟愈頭痛。BB大個仔有自己嘅思想，愈來愈有主見，好容易發脾氣，有時唔聽話都忍唔住鬧佢兩句。其實一味剩係鬧佢，BB都唔會聽得入耳，要慢慢同佢講道理。不如參考以下5個管教方法，睇吓點先搞得掂呢班12至18個月大嘅小朋友仔啦～

1. 獎罰分明
小朋友做錯事固然要糾正佢，但喺佢做得啱嘅時候，父母都好應該鼓勵同讚賞佢，等佢知道自己做咩係啱，做咩係錯。如果只係喺佢曳嘅時候鬧佢，佢永遠都會記得呢點。

Photo from Mamidaily

2. 訂立簡單規則
BB好多時咩都會跟住大人做，例如媽媽入廚房佢又跟埋一齊去，但係其實廚房危機四伏，係小朋友嘅禁地！所以父母可以同佢哋訂立幾個簡單嘅小規則，好似「食飯之前要先洗手」、「入屋後要即刻除鞋」等。一方面方便爸媽管教，另一方面亦可以教遵佢哋遵守規則。當然所有有份照顧BB嘅大人都要遵守規則，樹立好榜樣啦～

Photo from Mamidaily

3. 保持冷靜
然而，如果小朋友堅持做嗰啲你唔畀佢做嘅行為時，最緊要保持冷靜，控制好自己嘅情緒先再慢慢同佢哋講道理。當你強調咗幾次唔可以咁做，但佢依然唔聽話的話，就最好先離開現場，轉移佢哋嘅注意力，再逐步引導佢點做先啱。

Photo from Mamidaily

4. 轉移視線
BB對咩都好好奇，有時做啲好危險嘅事，例如玩電掣、喺床邊跳來跳去等，父母應該立即制止，即刻灌輸正確觀念畀仔女，「咁樣好危險，唔好咁做！」然後轉移佢嘅注意力去其他地方。

Photo from Mamidaily

5. 細心觀察
喺12-18個月呢個階段嘅小朋友，會因為發展特性而容易發脾氣同做一啲唔太適當嘅行為。父母鬧佢哋之前，不妨仔細觀察佢哋做呢啲行為嘅動機。可能佢哋想吸引你注意，又或者測試父母嘅底線。父母可以刻意忽視呢啲頑皮行為，唔好畀任何反應，到最後佢哋會知道原來咁樣做，得唔到父母注意就會停止。

Photo from Mamidaily

Text：Mami Editorial
Source：衞生署