報讀N班前 5大事項必須留意！

好多家長喺小朋友讀幼稚園前，都會先為佢哋報讀N班。讀N班並非必須，不過若然有打算為仔女報N班嘅話，以下幾點就需要留意啦。

1. 年齡

根據教育局規定，N班入學年齡為2歲。家長喺報名前，要先計清楚小朋友喺9月入學時，係咪已經夠2歲。

Photo from Mamidaily

2. 學校環境

家長可以趁住開放日，帶埋小朋友一齊去到學校參觀。家長可以睇下學校環境，同有咩校園設施外，亦可以順勢觀察下小朋友嘅表現，甚至問下佢哋對學校有咩感覺，從中了解一下小朋友鍾唔鍾意間學校。

Photo from Mamidaily

3. 學校地區

有家長為咗令小朋友可以入讀心儀學校嘅N班，不惜一切，帶住小朋友舟車勞頓去返學。好多時候，家長為小朋友選擇學校嘅首要考慮條件都係質素為重，好易會忽略咗地區嘅重要性。如果要小朋友花好多時間搭車，會令佢哋感到疲累厭倦，上堂時冇精神，分分鐘得不償失。

Photo from Mamidaily

4. 價錢

幼稚園有平有貴，未必一定愈貴愈好，加上價錢差異都幾大，家長應考慮清楚小朋友嘅需要同經濟能力而決定。同埋記得問清楚除學費外，仲有冇其他雜項費用。

Photo from Mamidaily

5. 師生比例

要問清楚每班有幾多個老師同學生，確保老師可以應付同照顧到每一個學生。

Photo from MamiDaily

Text：Mami Editorial