download MamiDaily 親子日常 app
【催淚!】早產孖仔腦出血 高齡媽難捨親生骨肉 堅拒放棄

【催淚!】早產孖仔腦出血 高齡媽難捨親生骨肉 堅拒放棄

懷孕
By Jacqueline on 31 May 2019
Senior Editor

TVB節目《媽媽唔易造》,第三集搵嚟一名高齡媽媽,分享佢嘅艱苦懷孕經歷。40歲嘅Louie婚後9年間一直都努力求子,不過從未成功。後來發現因為自己有子宮肌瘤,而且肌瘤比一般人大,超過10cm,所以胚胎難以著床。由於切除肌瘤會影響子宮,Louie惟有做試管嬰兒。

無綫電視截圖Photo from 無綫電視截圖

做IVF喜獲孖胎 20周險流產

Louie兩公婆決定去台灣做試管嬰兒。喺進行放卵時,醫生指因為Louie嘅腺肌瘤太大,幾乎冇位畀胚胎著床,只放到2粒卵子。不過幸好最後2粒卵子都成功著床,成功懷上雙胞胎。正當以為可以鬆一口氣嘅時候,喺Louie 20周產檢時,突然又發現自己患上子宮頸閉合不全,子宮頸比其他女士開口更大,承托唔到胚胎,好容易流產。醫生即時用矽膠托托住Louie子宮頸嘅位置,防止子宮一直張開。同時亦吩咐Louie唔好周圍去,盡量臥床。

無綫電視截圖Photo from 無綫電視截圖

無綫電視截圖Photo from 無綫電視截圖

陀B 5個月 子宮頸已開1度

不過,Louie老公就認為郁動多啲,生產過程會更順利。於是,喺懷孕5個月時,Louie被老公帶到商場行咗4個鐘。後來Louie覆診時,發現子宮頸已經開咗1度,即時入院用盡方法拖延,甚至連大小二便都瞓喺床上解決。Louie指當時為咗令BB唔好咁早出嚟,除咗食藥,更喺醫院倒吊。不過後來大孖心跳開始減慢,醫生表示需要立即催生。

無綫電視截圖Photo from 無綫電視截圖

無綫電視截圖Photo from 無綫電視截圖

早產孖仔腦出血 體積只有手掌大小

當時只開咗4度嘅Louie,痛足30個鐘先成功誕下孖仔。而孖仔出世後,亦即時被送到初生嬰兒深切治療部(NICU)急救。當時大孖只有530g,細孖則704g,Louie指孖仔只有手掌咁大,連一串提子都重過佢哋。Louie:「第一眼我係去咗睇細孖先,計危殆次序,細孖係排第一,佢插晒喉,向我伸手,好似係想叫我帶佢走咁。當時自己真係忍唔住,跑咗出去喊。」Louie兩個囝囝都有腦出血,大孖屬於1級出血,而細孖就嚴重到3級腦出血。醫生指,即使救返都好大機會影響智力,或者終生行動不便。

無綫電視截圖Photo from 無綫電視截圖

無綫電視截圖Photo from 無綫電視截圖

無綫電視截圖Photo from 無綫電視截圖

醫生勸喻放棄孖仔 Louie難捨親生骨肉

除咗腦出血,孖仔更有心導管閉合不存同腦抽筋情況,因此醫生就同Louie兩公婆商量,要唔要選擇放棄。Louie覺得自己咁辛苦先有咗BB,佢哋正常唔正常都好,都係自己嘅親生骨肉,於是堅拒放棄。Louie更指:「細佬,你唔放棄嘅,媽咪一定唔會放棄你!你唔好迫自己,你要走,我一定畀你走;你要留,媽咪一定會照顧到你死嗰日。」

無綫電視截圖Photo from 無綫電視截圖

無綫電視截圖Photo from 無綫電視截圖

孖仔奇跡康復 醫生:2000分之1機會

解決咗心臟問題後,孖仔喺NICU住咗兩個月,突然出現奇跡,連本來嘅腦出血問題都改善咗,醫生指,依個機率係2000分之1,而Louie嘅囝囝正正就係嗰個,非常幸運。依家Louie一對早產孖B已經2歲多,高度同智力都達標,唔使再去專科覆診,Louie此刻最大嘅心願就係孖仔身體健康,開開心心就足夠。

無綫電視截圖Photo from 無綫電視截圖

無綫電視截圖Photo from 無綫電視截圖

無綫電視截圖Photo from 無綫電視截圖

Text:Mami Editorial

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道