小朋友揀飲擇食？6大方法解決兒童偏食

小朋友揀飲擇食，做父母最擔心就係佢哋攝取唔到均衡營養，影響發育。不過小朋友拒絕食或只食某啲食物，亦有機會因其他原因所致。例如小朋友喺幼兒階段想表現獨立，由自己話事，於是故意唔食、亦可能因為飲得太多奶，食得太多零食，以致冇胃口試其他食物。

Photo from MamiDaily

Photo from MamiDaily

如果家長觀察過後，發現小朋友都並非以上原因而揀飲擇食，咁就可以試下以下幾個方法。

1. 每一正餐都提供多種食物，安排多過一個菜式選擇，包括一啲小朋友鍾意或唔抗拒嘅食物，另外亦加一啲新食物，等佢哋食得飽之餘，又能接觸新食物。

Photo from MamiDaily

2. 可以帶埋小朋友一齊去買食材，家長可提供幾個選擇畀小朋友，例如：「菜心、西蘭花、南瓜都好新鮮，你今晚想食邊款？」

3. 準備一啲健康嘅調味醬汁，畀小朋友用嚟沾蘸食物，例如乳酪，自製嘅蕃茄醬、果蓉。咁樣可以令食物變得有趣，同時可鼓勵小朋友食多啲蔬菜。

4. 改變煮食嘅方法，將食物整成容易接受嘅質感：例如小朋友唔食烚蛋，可嘗試蒸水蛋或煎蛋；如唔鍾意食烚軟嘅菜，可嘗試炒菜等。

5. 將食物放喺小朋友面前，家長可以同佢一齊吃，並鼓勵佢摸、嗅或品嚐，但唔好強迫，例如家長自己試過後，可同小朋友講：「呢啲菜心好好味，你都試下！」

Photo from MamiDaily

6. 用餐時，唔好一次過畀太多食物小朋友，應分少量食物畀小朋友，等佢食完，表示要再添食多啲時，再加添。

Photo from MamiDaily

Text：Mami Editorial
Source：衛生署