女兒出生6天搶救無效 爸爸：謝謝你來過這個世界

內地一個叫小毛嘅男子，同老婆菲菲結婚幾年後，上年7月終於有喜啦！小毛滿心歡喜等待BB降臨，同太太建立一個幸福嘅小家庭。可惜事與願違，唔止老婆因難產去世，連囡囡出世幾日後都離開埋世界⋯⋯

據報導指，小毛夫妻婚後為咗有BB，努力咗一段時間，去年7月終於有好消息！老婆菲菲自從有咗BB後，準備咗好多嬰兒用品，仲會每日同BB講故事、傾偈，仲幫佢改咗個名叫小毛豆，期望囡囡可以快樂成長。

Photo from MamiDaily

今年4月係寶寶出世嘅日子，小毛當日同其他親友喺產房外等老婆同即將出世嘅小毛豆。然而，老婆菲菲因羊水栓塞，搶救後不幸離世；而囡囡小毛豆亦因為重度窒息，被送到重症監護病房。醫生向小毛表示BB情況唔樂觀。

Photo from MamiDaily

出生6天後，醫生宣佈BB搶救無效。爸爸小毛又痛又悲，突然諗起老婆曾經講過，如果自己嘅生命冇辦法挽回，就去幫助其他有需要嘅人。所以小毛最後決定將囡囡嘅一對眼角膜同一對腎臟捐出，希望小毛豆能夠以另一種方式繼續留喺呢個世界。

Photo from MamiDaily

囡囡被推入手術室前，小毛喊住吻別囡囡。雖然痛失妻女，不過佢依然堅強地面對一切，尤其對囡囡嘅告別更加係非常感動：「雖然你未嚟得切睇呢個世界就離開咗。依家就等其他有緣嘅人，幫你繼續觀賞呢個世界！相信你一定會支持爸爸呢個決定。請你喺另一個世界，幫我好好照顧媽媽！」

Text：Mami Editorial