download MamiDaily 親子日常 app
必睇!初生寶寶清潔口腔6件事

必睇!初生寶寶清潔口腔6件事

mami熱話
By Circle on 29 May 2019
Digital Editor

好多爸爸媽媽都唔知究竟小朋友幾大先開始要每日刷牙~ 又好難界定邊餐先算係瞓覺前最後一餐奶!唔想BB第時大個蛀牙,就要盡早同佢建立保持口腔乾淨好習慣啦!即刻睇睇以下關於初生寶寶清潔口腔6件事啦。

1. 清潔口腔方法
BB出世後,家長應該每晚都要定時幫佢抹口腔,令佢哋大個之後比較容易學習同埋適應刷牙,亦可以令佢哋習慣有清潔又舒服嘅口腔。

2. 為初生寶寶清潔口腔嘅步驟
家長先預備紗布、棉花或手帕,另預備一杯白開水。幫BB清潔前,一定要用梘液徹底清潔雙手。之後,用紗布、棉花或手帕包住手指,點少少白開水,輕輕將手指伸入BB口腔內,貼著牙肉由上頜至下頜圍繞一圈,將上下頜抹乾淨。

MamiDailyPhoto from MamiDaily

3. 最適合為孩子抹口腔嘅時間
由於初生寶寶仲未有一個固定嘅作息時間,所以好難界定邊一次係當日嘅最後一餐奶。家長只需要喺夜晚揀一個時間為寶寶抹口腔就得啦!等BB 6個月或以上,有固定嘅飲食模式時,家長就可以喺佢哋食完瞓覺前嘅最後一餐,幫佢哋抹口腔。

4. 幾時開始刷牙?
寶寶生咗第一隻牙齒時,家長都應該繼續每日幫手抹口腔,同時都記住要抹埋生咗出嚟嘅牙仔。上下門牙都陸續出嚟嘅時候,就可以嘗試用一啲比較柔軟嘅嬰兒牙刷同開水幫BB刷牙。等BB第一隻臼齒出咗之後,家長就必須每日喺小朋友起身同瞓前幫佢或者指導佢刷牙。

MamiDailyPhoto from MamiDaily

5. 用咩刷牙先啱?
小朋友2歲前,家長應該幫佢哋揀一支刷毛柔軟、刷頭大約係港幣1毫子直徑(~15mm)咁大嘅牙刷。

6. 可以用牙膏?
牙膏方面,初期幫小朋友刷牙時,係唔需用牙膏嘅!可以等到小朋友識吐水之後先開始用~ 小朋友通常都鍾意有香味嘅兒童牙膏。

MamiDailyPhoto from MamiDaily

Text:Mami Editorial
Source:衛生署

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道