【高峰期！】月初至今115人中招 6大方法預防手足口病

衞生防護中心最新監測數據顯示，院舍學校爆發手足口病個案，由5月5日一星期7宗，增加至5月12日一個星期16宗。而截至噚日，今個星期已錄得9宗個案，涉及21人。喺過去4個星期，手足口病爆發個案主要集中喺幼稚園及幼兒中心。另外腸病毒71型感染方面，今年截至昨日共錄得4宗個案。

Photo from Mamidaily

中心表示，手足口病雖然全年都會出現，但高峰期為5月至7月。患者喺病發初期通常會出現發燒、食慾不振、疲倦及喉嚨痛。發燒後1至2日，口腔可能會出現疼痛嘅水疱，水疱初時呈細小嘅紅點，然後會形成潰瘍。潰瘍通常位於舌頭、牙肉以及口腔的兩腮內側。另外，手掌及腳掌，甚至臀部及／或生殖器亦會出現不痕癢及有時會帶有小水疱嘅紅疹。手足口病患者亦可能沒有病徵，或者只出現皮疹或口腔潰瘍等病徵。而幼童相對較容易感染手足口病，家長應該多留意佢哋嘅健康。

由於手足口病個案持續上升，中心已向醫生、幼兒中心、幼稚園等發信，呼籲留意最新情況，學校亦須按照「預防傳染病指引」執行預防及控制措施。

Photo from Mamidaily

預防手足口病方法：

1. 經常保持雙手清潔，尤其喺觸摸口、鼻或眼之前，進食及處理食物前，接觸水疱後，及如廁後。如冇洗手設施，用含70 － 80%嘅酒精搓手液潔淨雙手亦可行。

2. 打噴嚏或咳嗽時應用紙巾掩蓋口鼻，將用過嘅紙巾棄置喺有蓋垃圾箱內，然後徹底清潔雙手。

3. 用膳時要用公筷同公匙，唔好同其他人共享同一食物或飲料。

4. 唔好同其他人共用毛巾或其他個人物品。

5. 避免同患者有親密接觸，如接吻、擁抱。

6. 經常清潔及消毒常接觸嘅表面，如傢俬、玩具、共用物件。

Text：Mami Editorial
Source：衞生防護中心