8個理由愛上做媽媽！

雖然成日聽到類似「做媽媽真係好攰」、「生咗BB之後冇覺好瞓」嘅說話，不過當做咗媽媽之後就明白無論幾辛苦都好，望住自己嘅小朋友就會覺得好幸福，世界上冇嘢比得上佢哋～ 以下呢8樣嘢更加會令人愈嚟愈鍾意擔當媽媽呢個角色。

1. BB嘅笑聲
日常生活入面，經常有啲無聊嘢觸動到BB嘅笑點，佢自己喺度傻笑，笑完又笑。做媽媽嘅望到BB笑，自己好自然又笑埋一份。聽到BB嘅笑聲，真係會好幸福同放鬆。

2. 睇住BB成長
每次只要諗到呢個人仔喺自己同老公孕育出嚟嘅小生命，由佢喺肚入面，出咗世之後，每日都有變化。BB愈學愈多嘢，由簡單發音到「爸爸媽媽」，甚至可以用短句表達意思，真係好感動。

Photo from Shutterstock

3. 重獲童真
平時瞓覺之前，講故事畀BB聽；有時間嘅話又會一齊睇卡通片，甚至到佢哋開始返學學唱兒歌，喺佢哋嘅世界所有事物好有童真，媽媽嘅世界亦重拾單純嘅美好！

4. 成為孩子嘅避風港
每次發生咩事，小朋友第一時間都係望住自己，用眼神向你求救！有人全心全意信任、倚賴自己嘅感覺，真係好滿足～

Photo from Shutterstock

5. 簡單就是快樂
人愈大就會諗愈多嘢。相反喺BB嘅世界，簡單到一塊餅、一粒糖都已經好開心！喺BB身上學習到「簡單就是快樂」呢個道理～ BB快樂，媽媽就快樂！

6. 發掘自己更多優點
做咗媽媽之後，學識嘅嘢愈嚟愈多，好似餵奶、換片等湊仔技能已經熟能生巧！生咗BB之後，喺自己身上發現到比以前更多優點，好似耐性好咗、大力咗咁樣，原來自己比想像中更加堅強。

Photo from Shutterstock

7. 圈子再次擴展
生咗BB之後，唔知點解識到好多同道中人嘅新手媽媽，圈子突然擴闊咗好多！成班媽媽一齊傾湊仔經，有時仲會帶埋仔女出去搞個gathering！

8. 意想不到嘅收獲
BB除咗係自己人生最大嘅收獲之外，新降臨到呢個世界嘅人仔，對好多事物都好好奇，佢嘅一舉一動都令到自己感受到愛意，令自己嘅母愛愈嚟愈氾溢！

Photo from Shutterstock

Text：Mami Editorial