母乳媽媽大細胸好煩惱？

好多女士由細到大都有大細胸嘅問題，生完BB開始餵母乳之後，個問題仲愈嚟愈嚴重。乳房大小不一，唔止自己唔方便，更值得關注嘅情況係左右兩邊嘅奶量唔同，真係好煩惱！

大細胸嘅成因有好多，例如有啲人係天生、有啲就因為慣用手（常用右手，右胸有機會細啲）、又或者係因為著咗錯嘅內衣，當然餵母乳都係其中一個造成胸部大小唔同嘅原因啦！

Photo from Shutterstock

首先要釐清一點，影響奶量嘅係乳腺！胸部嘅大小同奶量唔係成正比嘅，就算胸部小，唔代表奶量少。媽媽嘅胸部大小有別主要因為乳房對泌乳激素嘅敏感程度有所唔同，其中一邊嘅乳腺比較暢順，好大機會令到BB剩係固定食一邊，從而令嗰一邊嘅胸部製造更多奶，結果令大細胸情況更嚴重。

Photo from Shutterstock

所以媽媽唔好因為餵一邊餵得好快又舒服，就貪方便只餵一邊。改善呢個問題嘅關鍵就係要諗辦法，令BB會輪流左右兩邊都食～ 因為BB吸吮嘅次數愈多，母乳分泌就會隨之增加！建議媽媽可以多啲畀BB吸啜奶水較少乳房嗰邊，咁就可以促進乳腺通暢。

Photo from Shutterstock

如果BB唔肯食，可以趁佢哋眼瞓冇咁挑剔嘅時候餵！平衡返兩邊嘅奶量，就可以慢慢改善情況。餵完母乳後，按摩胸部都有幫助㗎！好多媽媽都話大細胸呢個問題，會喺哺乳期之後慢慢回復正常㗎啦～

Text：Mami Editorial