每10個女性就有1個患上！有關子宮內膜異位症6件事

好多女士每個月都會飽受經痛困擾，最慘嘅一定係痛到乜都做唔到，影響工作同生活。子宮內膜異位症就係造成經痛其中一個原因。

根據香港醫學會嘅資料顯示，子宮內膜，即係子宮內層嘅表皮，而子宮內膜異位症，就係指表皮嘅組織生長到子宮以外嘅器官或組織。簡單嚟講，即係只要有經期嘅女性，都有機會患上子宮內膜異位症。即睇以下6樣關於子宮內膜異位症嘅事，了解多啲啦！

1. 比想像中更常見
香港大約有30萬位女性患有子宮內膜異位症，即係大概每10個就有1個，真係比想像中更常見。

2. 原因和家族史
到現時為止，醫學界仲未清楚知道女性嘅子宮內膜組織生長到其他地方嘅原因。不過，如果家族裡面如果有家人患過子宮內膜異位症，自己患上嘅機率可以高達7成。

Photo from Shutterstock

3. 停經後自動康復
呢種病只會發生喺生育年齡嘅女性身上，有指患子宮內膜異位嘅女性大部份都係30至40歲或未婚，或未曾有分娩嘅女性。而分娩過後嘅女性，患子宮內膜異位症嘅機會比較低。而病患者收經後，病情亦會隨之消失。

4. 經痛原來係其中一個症狀
子宮內膜異位症嘅常見症狀包括月經異常、長期經痛、經血有血塊、性行為時或完事後疼痛、子宮後屈、尿道炎及排便困難等。

Photo from Shutterstock

5. 嚴重可致不育
子宮內膜異位症令女性不育嘅風險增加。程度較輕微嘅子宮內膜異位有可能減低生育能力，而中度至重度子宮內膜異位症更有機會扭曲輸卵管同卵巢，影響排卵，從而導致不孕。

6. 預防勝於治療
最好嘅預防方法就係改善生活上嘅陋習，好似夜瞓、飲酒等。最好就係養成運動嘅習慣，每個星期最少做4個鐘嘅運動，唔止可以促進血液循環，又可以平衡體內嘅荷爾蒙。當然亦唔少得每年都去做身體檢查啦！

Photo from Shutterstock

Text：Mami Editorial
Source：香港醫學會