寶寶食奶嘴8大要點

BB一扭計，爸爸媽媽好多時都即刻畀個奶嘴佢哋啜，既有安撫作用，又可以令佢哋慢慢安靜落嚟。決定畀BB食奶嘴之前，記得要注意以下8個事項啊！

1. 最好滿月後先用
喺BB未滿月前，用奶嘴有可能令食母乳嘅BB將乳頭同奶嘴混淆，有機會令佢哋吸吮母乳方法唔正確。所以最好就係等BB掌握正確嘅吸啜方法後，先畀佢哋開始食奶嘴～ 一般會喺BB一個月大嘅時候，不過每個BB學習時間都唔同，所以需要由父母觀察！

2. 選購堅固嘅奶嘴
盡量避免使用品質唔係太好嘅奶嘴，尤其要選購堅固同埋物料唔易剝脫嘅。如果唔係嘅話，橡膠部份脫落，有機會哽塞呼吸道，非常危險！

Photo from Shutterstock

3. 小心有掛繩嘅奶嘴
市場上有好多設計有掛繩嘅奶嘴，等奶嘴唔會咁易跌。父母選用呢啲奶嘴時，一定要好小心，千祈唔好將奶嘴繩掛喺BB頸或者手上面，以免被繩子纏住，造成窒息！

4. 使用前一定要消毒
屋企多塵、出街又多菌，畀BB食之前、食完之後，都一定要徹底消毒。而BB 6個月後，奶嘴用完之後，只需要用清潔劑同清水沖洗就得啦。

Photo from Shutterstock

5. 準備多幾個備用
好多時BB食慣咗嗰個奶嘴，就唔肯食其他～ 加上奶嘴經常會跌落地，帶定多幾個備用就放心啦！

6. 定期更換
為咗保持奶嘴乾淨同衛生，就算未爛都要定期更換！最好2-3個月換一次～

Photo from Shutterstock

7. 熟睡後要小心
如果BB要食住奶嘴瞓覺，而佢瞓著咗之後，冇再咬住個奶嘴，父母最好唔好再放返入佢個口度。

8. 唔好將任何嘢搽上奶嘴
BB食奶嘴，好多時都要含喺口一段時間。奶嘴上最好唔好搽任何嘢，尤其係有甜味嘅嘢，好似蜜糖、果醬等，對牙齒發展有唔好嘅影響。

Photo from Shutterstock

Text：Mami Editorial
Source：衛生署