【母親節禮物令人感動 亦帶少少內疚同苦澀】

每年母親節，幼稚園小朋友都一定有一d小手作送俾媽咪。用唔同物料整嘅心意卡，手鏈，頸鏈，頭飾，花束等等。

未做媽媽嗰時，見到其他已經係媽媽級嘅朋友，收到自己仔女送嘅手作母親節禮物時，嗰種感動其實都唔係好明。嗰時會諗: 係咪真係會咁開心? 個個小朋友係幼稚園都會整架啦..

但今年，當讀緊K1嘅安安，送左一條用通心粉同彩色膠鈕穿嘅頸鏈俾我個刻，原來真係有一種從心而發嘅感觸同感動，堅係會眼濕濕。（明明知道條頸鏈其實大部分都係老師從旁協助完成）

感動，係個一刻一句: 媽媽我愛你 或者 媽咪辛苦你了。 呢句說話提醒左我: 就快四歲嘅安安，雖然愈大愈有自己主見，愈多鬼主意，愈多駁咀駁舌時候，愈多小對抗，小反叛。但呢d都係小朋友必經的一個成長中的性情轉變。他還是當初嗰個，我願意經歷十級痛&十月懷胎生出黎的心肝寶貝! 雖然每日都總有大大少少嘅百厭激氣事發生，但係, 我仲係好愛好愛佢!

有時孖媽我，只係太累，忘記左要對兩個仔溫柔; 忘記左原來小朋友好單純，即使偶爾兇左佢，對佢失去耐性，但佢仲係好愛孖媽我。所以當安安好認真，好天真咁同我講: 媽媽，我好鍾意你呀。媽媽，我愛你，你辛苦了...個一刻係我心入面，嗰種感動甚至帶少少內疚同苦澀。

無小朋友係百分百完美，亦無百分百完美嘅媽咪。但愛你係永遠都唔會變嘅。

興幸，自己仲可以有呢種感觸、感動。因為我知道，當小朋友愈黎愈大，有時自己可能都已經對"母親"呢個身份麻木左嘅時候，會唔會無左當初，初為人母見證仔仔每個第一次嘅嗰種感動同興奮。

母親節禮物，喚醒左當初個份最單純"愛"嘅承諾。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：安安迪迪的孖媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！