爸媽開心都嚟唔切 因為你生咗個聰明BB

當BB學識講嘢後，好多時都會有好多令爸媽意想不到嘅事發生，加上依段時間嘅小朋友成日無時停，爸媽都會覺得BB開始曳曳！但原來如果有以下依3種「曳曳嘅行為」，咁爸媽真係開心都嚟唔切，因為你生咗個聰明BB！

1. 愛插話

小朋友開始講嘢後，發現小朋友成日好無禮貌，大人傾?偈，又搶住叫「媽媽！媽媽！」再唔係就好留心聽大人講嘢，跟住突然插一句話，畀反應～

但原來依類型小朋友比一般小朋友學嘢更快。3歲左右時，係小朋友語言發展最豐富嘅階段，小朋友鍾意插話其實係吸收語言刺激後嘅反應，越多插話或者反應，證明小朋友吸收語言能力高！所以唔好即刻制止佢哋，可以好好引導同佢哋，例如先畀佢哋講嘢，然後問返佢「咁依家到媽媽講喇，一陣再到你！」好好引導後，以後依位小朋友喺語言能力上都會有唔錯表現呀～

2.你講咩 佢講咩 學到足

做爸媽絕對要注意自己行為，因為屋企有個「小閉路電視」一日到黑都望住你做咩，你做咩，佢做咩～而且最令爸媽頭痕嘅係，自己有時唔小心反應大，講咗句唔應該講嘅嘢「Oh,ShXX」，小朋友即刻跟住學，仲要有時用得啱！

雖然衰嘢唔好學，但小朋友依個「曳曳行為」其實又證明小朋友係聰明寶寶！因為對於0-3歲小朋友嚟講，要好好發展智力，必須透過模仿上學習，小朋友可以短時間記住，然後喺某段時間再展現出嚟，係要通過吸收同消化，模仿得越多，日後學習越快！

3. 鍾意拆嘢

唔知有冇爸媽試過，當買嘢返到屋企，仲係有個小跟班同你一齊拆嘢，又或者當買嘢畀小朋友，佢總係搶嚟拆！最搞笑係，依班小朋友往往都對入面係咩無咩興趣，只係純粹追求「拆」嘅過程。原來依班鍾意拆嘢嘅小朋友，比坐定定等你搞掂嘅小朋友叻～

小朋友鍾意拆嘢其實係對事物好奇，而且拆嘢對小朋友發展邏輯思維相當有幫助，佢清楚知道事情嘅先後次序，而且亦證明小朋友愛動手創造嘅能力，激發佢哋成為小發明家能力！所以爸媽千其唔好阻止，亦唔好太直升機家長，所有嘢幫小朋友搞掂呀～

其實小朋友發展嘅潛能相當強勁，只要唔影響到身體，唔會有危險，爸媽都唔好阻止小朋友嘗試。如果會影響到秩序，爸媽可以先解釋後果，或者先畀小朋友表達感受！多啲畀佢哋嘗試，潛能可能真係會嚇你一跳！

Text：Mami Editorial