【婆婆對孫仔孫女嘅愛係獨一無二 請好好珍惜啊】

禧禧由岀世開始就由婆婆幫手湊到大概一歲，由飲奶到加固到學習話說和行路，每一個階段婆婆都會問到足，睇到實，甚至乎會岀手處理。

婆婆會成日問我禧禧有冇飲奶，飲左幾多；有冇食野，食左咩野；有冇著衫，著左幾多件；有冇瞓覺，瞓得好唔好!! 我平時間中會蒸魚拆肉俾禧禧食，有一次唔為意俾左隔夜魚肉（隔左兩日）佢食，可能當時禧禧仲細，婆婆好激氣，佢覺得我好大意，怕禧禧食左會肚痛唔舒服。見到婆婆當時緊張既樣，打從心底裡面覺得我個女好幸福，有一個咁錫佢既婆婆。

禧禧亦係一個百日哭既小朋友，由第十二朝開始，每晚凌晨一至五點會毫無原因地喊，喊到五點就會瞓，準過鬧鐘，婆婆每晚都岀手幫忙又抱又氹，仲不停叫我去休息，話唔夠休息會唔夠母乳，又話剛生完小朋友坐月係好重要，記得當時我都好大壓力，成日喊，因為禧禧晚晚喊，一來怕佢有咩唔舒服，二來自己又唔夠瞓，總之就係好難過。嗰段期間真係多得婆婆協助，我同禧禧爸先感覺輕鬆一點。

今日禧禧同婆婆岀街，我影左佢兩婆孫相處既相，自己覺得每張都好靚，因為我見到每一張相都滿載住婆婆對孫女的愛。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：禧。熙。之生活點滴

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！