【未必係濕疹！】5大常見BB皮膚問題＋護理方法

BB皮膚幼嫩，一唔小心就好易敏感、紅腫痕癢等。唔少新手爸媽見到呢個情況，都會好緊張，好擔心BB嘅健康，又唔知點算好。今次同大家分享幾個初生BB常見嘅皮膚問題，同埋應對方法，畀大家參考下。

1. 尿布疹

初時係紅斑，接住就會出現細小凸起嘅紅疹。通常出現喺著尿片嘅範圍，例如：外陰、會陰、臀部、下腹部及大腿上部等。

Photo from Shutterstock

護理方法：

家長應勤加換片，保持BB臀部清潔及乾爽。喺換片時，先用暖水清洗臀部， 盡量避免使用濕紙巾，如有需要可用肥皂/沐浴液清潔。 幫BB清潔完臀部後，應等BB皮膚乾爽後，先著上尿片。另外，切記唔好使用爽身粉，因爽身粉同尿液或汗水混合後，會阻塞毛孔，令尿布疹惡化。

2. 新生兒痤瘡

細小凸起嘅紅疹。喺BB出世頭幾日或幾星期時，最常見。多數會出現喺BB額頭同面頰。

Photo from Shutterstock

護理方法：

通常喺BB出世後三個月內就會自然消失，保持BB皮膚清潔乾爽，無須擠壓同塗抹任何藥膏。

3. 熱痱

細小凸起嘅紅疹。通常天氣一熱，或者幫BB著得太多衫，令BB過熱，就會好易出現喺BB頸部、背部同胸前位置。

Photo from Shutterstock

護理方法：

用清水幫BB清潔皮膚。因應溫度，為BB著上適量嘅衣物，保持皮膚乾爽涼快，減少流汗。

4. 嬰兒粟粒疹

好似針尖大細嘅白色或黃色小丘疹，摸落去感覺比較扁平。通常會出現喺BB嘅額頭、面頰、下頷同鼻子等部位。另外，有啲初生BB嘅口腔牙齦上都會有呢啲白色小珠，稱為艾泊斯坦氏小珠。

Photo from Shutterstock

護理方法：

通常2至3個星期就會自然消失，無須特別治療及護理，家長唔好用手擠壓同幫BB亂搽藥膏。

5. 脂溢性皮膚炎

BB嘅皮膚會輕微變紅及黏住油膩嘅小薄片或黃色嘅厚鱗屑，形成一層瘡痂。通常出現喺皮脂腺較多嘅部位，例如：頭部、前額、面頰、眼眉、耳朵、腋下、腹部和大腿間的皺摺部位。如果喺頭皮出現，便稱頭泥。脂溢性皮膚炎喺3星期至3個月大嘅BB身上比較常見，不過大部分會喺半歲左右逐漸減退。

Photo from Shutterstock

護理方法：

每次清潔皮膚後，幫BB搽上水分潤膚霜，保持皮膚滋潤。如果頭泥太厚，可將橄欖油塗抹喺頭泥上，令頭泥軟化，用棉塊輕輕抹走。然後以嬰兒洗髮液清洗，再用梳子清理黏住喺髮上嘅頭泥。

以上護理方法只係畀家長做參考，如果BB出現嘅皮膚問題嚴重，必須求醫，進行進一步檢查及治療。

Text：Mami Editorial
Source：衛生署