【綠色炸彈！】填表要小心 必睇5大報稅注意事項

「綠色炸彈」又嚟啦！稅務局喺噚日（2日）開始，發出268萬份個別人士報稅表，如果選擇電子通知書嘅「稅務易」用戶，可以即時喺網上睇到及填寫報稅表。而其他市民亦會喺呢幾日內收到郵寄嘅報稅表。大家喺填報稅表嘅時候，一定要小心，填錯或者填漏，都有可能會導致交多咗稅額，甚至被罰款。填表前，不妨先睇下以下幾個小貼士。

Photo from Shutterstock

1. 檢查僱主填寫嘅收入金額

稅單要填嘅嘢都唔少，好多打工仔會貪快貪方便，直接將僱主提供嘅報稅單，上面所寫嘅入息金額，直接搬字過紙。但其實僱主所提供嘅報稅單有機會出錯，所以一定要核對清楚，否則有機會交多咗稅項。

2. 薪俸稅要注意

薪俸稅有幾個開支係畀僱員選擇扣減，例如強積金供款、居所貸款利息、長者住宿照顧開支等，不過好多人會漏錯，特別係強積金供款。由於僱員強積金稅務扣減最高限額為18,000元，如果僱主填寫僱員入息，係直接列出未扣減強積金供款前嘅金額，打工仔就必須喺薪俸稅扣除嗰度，填返僱員強積金供款嘅金額，如果唔係有機會交多咗18,000元稅。

3. 做善事有得扣稅

慈善捐款係有得扣稅，不過要留意，市民係要捐畀香港免稅慈善團體，或者政府作慈善用途先可以扣稅，而且每次捐款金額唔可以少過100元，同埋必須要有收據證明。

4. 兼職、Freelance都要報稅

如果打工仔除咗正職之，亦有兼職或Freelance工作，都一定要報稅。如果冇報，有機會被視為刻意逃稅，可被罰款50,000元、相當於少徵收稅款三倍嘅罰款及監禁三年。

5. 準時交表

最後，最重要當然係要準時交報稅表。除咗選擇網上交表嘅納稅人，可延期一個月遞交之外，一般人都必須喺一個月內，即6月3日前交表。同埋如果係用郵寄方式遞交報稅表，就要記得畀足郵費啦，否則報稅表會退返畀納稅人㗎。

Text：Mami Editorial