BB唔肯飲奶 點算好？必睇4招解決厭奶期

好多新手媽媽對於BB突然唔飲奶、奶量不增反減，都會好擔心，怕BB會餓甚至營養不足。其實1歲以下，特別是3至6個月大嘅BB，都好容易有呢個情況出現，亦即是俗稱嘅「生理性厭奶」。家長唔需要太過擔心，今次同大家分享幾個方法，幫BB輕鬆度過厭奶期啦。

1. 少食多餐

父母可以先留意一下BB飲奶嘅份量，睇下飲幾多會開始出現厭奶，之後再控制每餐嘅份量。唔需要太擔心BB飲得少，等佢哋想飲嘅時候再餵過，千祈唔好強迫BB一定要飲晒，否則好易令佢哋產生恐懼，變得更抗拒。

Photo from shutterstock

2. 舒適環境

BB好易會畀外界嘅事物吸引，建議父母可以試下搵個安靜適舒嘅位置餵奶，免得BB畀其他人、事物、聲音導致分心，搞到唔想飲奶。

Photo from shutterstock

3. 餵奶方式

不妨試下轉換一下奶樽，用唔同款或唔同顏色嘅奶樽餵奶，等BB有新鮮感。另外，如果再大啲嘅BB，父母更可嘗試以杯或湯匙協助餵奶，甚至畀佢哋自己拎住自己飲，佢地覺得更有趣。

Photo from shutterstock

4. 奶嘴口徑

BB飲得少奶，亦有可能係因為奶樽嘅奶嘴口徑問題，BB可能飲得唔暢順，自然愈飲愈少。建議父母可以將奶樽倒轉，檢查下奶水係咪可以順利流出嚟，如發現有問題，就要快啲換過個奶樽或奶嘴。

Photo from shutterstock

Text：Mami Editorial