同經歷生死考驗 汪明荃羅家英甜蜜共度30載
今日(5月2日)係阿姐汪明荃同羅家英嘅結婚10週年紀念日，噚晚佢哋小倆口提早食飯慶祝，仲輕鬆小酌幾杯㖭，相愛31年都仲咁恩愛，真係令人非常羨慕！
今年72歲嘅汪阿姐同家英哥喺1988年相遇，兩人因粵劇結緣。家英哥曾自爆當年一場粵劇表演完結後，阿姐去到佢嘅化妝室，忽然抱着佢，仲錫咗佢一下，嚇呆咗嘅家英哥定神後，心諗真係艷福不淺喇！
之後家英哥霸氣回應咗句：「我不會讓人在舞台上欺負你！」，仲話「書被蓋了章，就歸私有，一個吻就是一個蓋章，從那之後，我就是你一個了。」難怪阿姐咁鍾意家英哥啦！
家英哥曾經親手撰寫情信，向阿姐剖白心中情。上款尊稱阿姐為「太后」，內文叫佢做「麗莎」，下款更鬼馬自稱「英英」。呢封情書一字一句都充滿愛，外人睇都「起晒雞皮」，阿姐一定冧到爆啦～ 家英哥話佢哋戀愛21年，60幾歲先結婚，對佢嚟講，遲一啲都冇所謂，只要有一個好嘅結尾，最後同到阿姐一齊，就好似詩詞上所講「兩情若是久長時 又豈在朝朝暮暮」，字裡行間都甜到爆！
當年，汪阿姐喺2002年發現自己患上乳腺癌同甲狀腺癌，家英哥唔止冇離棄阿姐，仲直接向佢求婚，話要照顧佢一世！喺另一半嘅悉心照顧下，阿姐好快就康復，可惜喺2004年，就到家英哥發現有肝癌，仲要已經去到第3期。今次就調轉由阿姐陪伴家英哥對抗病魔，仲應承只要抗癌成功，就會即刻結婚。因此佢哋喺2009年，雙方都過咗60歲先喺美國拉斯維加斯註冊結婚。
一段經歷過生死考驗嘅愛情，關係肯定變得更堅固。家英哥仲同阿姐盡訴心中情：「我們之前身體不好，你剩半條命，我也剩半條命，我們就合成一條命，相依相命、同心到老。」仲話佢哋係天造地設嘅一對，「如果下輩子在一起，我很願意，你呢？」呢一段真係有史以來聽過最感動嘅情話，極度真誠，家英哥原來咁浪漫，難怪順利抱得美人歸啦！
【隨時隨地接收更多育兒教育資訊】
📱 立即下載 MamiDaily 親子日常APP
🤱🏻 追蹤我們的 Instagram: mamidaily.hk
🔔 訂閱 MamiDaily 親子日常 Youtube頻道
