8歲女童「性早熟」胸部隆起 元凶竟然係塑膠飯盒！

食唔晒嘅飯餸，好多人都會習慣用塑膠飯盒裝住，留返第二日，用微波爐加熱再食。不過要小心，日前浙江杭州一位年僅8歲嘅女童，因胸部提前發育，於是前往醫院接受檢查，最後發現係因為呢啲塑膠飯盒，而導致性早熟。

Photo from shutterstock

一位8歲嘅女童，喺未步入青春期嘅時候，胸部已經提前發育，因此被父母送去醫院接受檢查。醫生發覺佢嘅骨齡相比同年齡嘅人大3歲，但就比佢哋嘅標準身高，矮咗12cm，而且將來可以繼續長高嘅機會亦唔大，估計最多只有150cm，醫生表示係性早熟嘅現象。女童父母感到非常驚訝，表示一向對女童嘅日常習慣同飲食都好重視，從來都唔食西式快餐，亦唔會玩電子產品，估唔到囡囡竟會出現性早熟。

醫生發現女童屋企每日都會用塑膠飯盒，而飯盒更已經用到泛黃及焦糊。醫生又指，有唔少兒童都因為性早熟嘅問題去醫院求診，而佢哋大部分都有用塑膠飯盒嘅習慣。由於呢類塑膠品好多都含有類雌性激素，如鄰苯二甲酸酯、雙酚A等。所以反覆使用並加熱塑膠飯盒，好容易會釋出呢類化學物質，並喺體內積聚，影響身體代謝，干擾人體內分泌，導致性早熟。

Photo from shutterstock

其實過往已經有唔少研究證實塑膠品同性早熟有關係，如果唔想小朋友因為呢啲塑膠品而導致性早熟，家長就要留意以下3點。

1. 改用玻璃或鏽鋼容器，代替塑膠容器。

2. 切勿用塑膠容器，如膠袋、膠樽、膠盒、保鮮紙等，裝放熱食或進行加熱，避免釋出更多嘅塑化劑。

3. 阻止小朋友咬玩具，而且接觸玩具後必須洗手。另外，唔好畀小朋友沖涼嘅時候玩塑膠玩具，防止玩具溶出塑化，透過皮膚進入體內。

Text：Mami Editorial