唔夠瞓要小心！兒童睡眠不足6大壞處

早前，世界衛生組織發佈新指引，1歲以下嬰兒每天需保證12到17小時睡眠時間，1至2歲幼童每天需有11至14小時睡眠，3至4歲幼童每天則需要10至13小時睡眠。充足嘅睡眠真係非常重要，瞓唔夠，對小朋友會有好多影響。

1. 影響發育成長

瞓覺嘅時候，位於大腦嘅腦垂體會分泌較多嘅生長激素，生長激素會促進骨骼、肌肉等增長，有利於小朋友長高。如果唔夠瞓，可能會導致生長激素分泌不足，影響到發育。

Photo from shutterstock

2. 近視

充足嘅睡眠可以促進神經系統及放鬆全身肌肉，包含眼球肌肉嘅休息同組織修復等。有調查指出，睡眠時間不足9小時，相比起睡眠時間達至9小時者，近視風險增加逾9倍，當中睡眠時間不足9小時，而有近視嘅學童佔7成多。

Photo from shutterstock

3. 專注力不足

大人細路都一樣，如果唔夠瞓，精神狀態就會變差，小朋友眼瞓或疲累，會令專注力下降，容易影響到學習表現，難以投入課堂。

Photo from shutterstock

4. 脾氣差

瞓得唔好或者睡眠不足，會令人心情差，甚至脾氣變得暴躁。呢種情況喺BB身上最為明顯，BB唔夠瞓、半夜醒來，通常都會不停哭鬧。

Photo from shutterstock

5. 容易肥

睡眠不足會令體內激素失衡，令人食慾增加，因此攝取過多嘅卡路里。有研究指出，每日瞓六小時嘅人，比瞓九小時者，腰圍平均粗闊3厘米，磅數亦相對較重。

Photo from shutterstock

6. 記性差

瞓覺唔止係休息咁簡單，仲係幫助修復大腦功能。人類嘅記憶會透過夜晚瞓覺嘅時候，轉化成長期記憶。瞓覺其實係令大腦重啟，鞏固記憶，如果睡眠不足，分分鐘會令記性變差。

Text：Mami Editorial
Source：世界衛生組織