有咗小朋友做人肉鬧鐘，睇早場完全無難度

做左爸媽之後，生活真係有好大改變。除左同「自然醒」講再見之外，相信以下幾點都係爸爸媽媽喺小朋友未出世之前，一定唔會咁做嘅事。

1. 睇戲揀早場

大部分小朋友都活力十足，朝早好早起身，假期都唔例外，睇戲揀早場係一個皆大歡喜嘅選擇。

2. 旅行行程包括公園滑梯時間

旅行嘅時候，觀光同購物原本係最常見嘅兩大行程。但係，我諗好多爸爸媽媽都好明白，行程表裡面不可或缺嘅唔係呢兩樣，去公園玩耍放電，先係每日行程嘅必要。

3. 去主題公園幾乎多過去戲院

由小朋友出世開始計起，去主題公園嘅次數多過入戲院睇戲，一啲都唔奇。一嚟小朋友去主題公園幾多次都係唔會厭嘅；二嚟戲院環境黑而且音響聲大，對於好多幼稚園小朋友，未能夠適應係好正常嘅事，未可以成功喺戲院睇到完場亦都正常不過。

4. 參觀香港嘅博物館

香港科學館、香港太空館、香港鐵路博物館、消防及救護教育中心暨博物館……等等，都係爸爸媽媽帶小朋友去參觀嘅好地方，相信爸媽未有小朋友前，絕少咁積極遊覧。

Text: Mami Editorial

Photo Source: Shutterstock