與老婆相愛30年 補度蜜月 少爺占低調放閃
現年42歲嘅DJ少爺占（甄子康）同太太冼燕珍（Tina）係青梅竹馬嘅幼稚園同學，2006年結束17年愛情長跑，到今年已經係結婚13週年啦！日前少爺占罕有地喺社交平台放閃，帶老婆去東京補度蜜月之餘，仲大讚Tina不惜放棄瞓覺時間，用心照顧囝囝。
DJ少爺占同太太Tina係幼稚園同學，兩人喺中學重遇，至今已經相愛30年，依然甜蜜無比！平時Tina為人非常低調，只願做老公背後嘅女人，不過日前少爺占難得喺Instagram分享同老婆合照，兩人難得放低寶貝仔，孖住去東京旅行，補度蜜月。
Photo from Facebook截圖
自從生咗囝囝Timmy後，老婆全副心機放晒喺佢到，連少少嘅休息時間都冇。少爺占話：「要照顧兒子這幾年我未見過你休息，沒有一天睡超過五個小時。難得Timmy 選擇去爺爺嫲嫲家，隨時可兌現，只要你肯跟我走。」難得公開向老婆示愛，加埋張「低調合照」真係好閃啊！
少爺占囝囝Timmy今年已經5歲，佢中文名係甄和天，係代表甄子康和Tina，加埋佢哋嘅故事，兒子切切實實係佢哋嘅愛情結晶品，成件事真係好sweet！好多人都讚Timmy又乖又聽話，一定係老婆Tina嘅功勞，一家三口加埋狗狗真係好幸福，真係令人非常羨慕啊！
Text：Mami Editorial
【隨時隨地接收更多育兒教育資訊】
📱 立即下載 MamiDaily 親子日常APP
🤱🏻 追蹤我們的 Instagram: mamidaily.hk
🔔 訂閱 MamiDaily 親子日常 Youtube頻道
