孩子出世後感到好困身冇自由 但又好享受同孩子相處 為人父母3個矛盾心事

生咗孩子後，絕大部分父母都認同孩子幾乎佔據著自己大部分時間，加上孩子總愛黐著自己，經常要求抱抱亦常令媽媽無法做家務，有時難免會懷念以前無拘無束嘅生活。之不過，懷念歸懷念，有時自己同友人外出聚會，內心亦會萬般掛念家中嘅孩子。為人父母後，內心總係充滿好多矛盾心情。

Photo from Shutterstock

1. 想孩子快高長大又怕大得太快

由BB出生起，爸媽都會覺得BB嘅初生階段太折磨大人，希望BB快啲長大、戒夜奶、戒百日哭、抬到頭、識爬、識行、識自己進食⋯⋯當BB愈黎愈進步，逐漸變成有思考、活動靈敏、識表達自己嘅幼兒後，父母一方面高興孩子長大，另一方面又若有所失，好懷念從前嘅小BB，開始擔心BB大得太快以後，會慢慢疏離父母。

Photo from Shutterstock

2. 怕孩子太黐自己又怕孩子唔親近自己

當BB哭喊，媽媽總會心軟忍唔住第一時間抱抱BB，給予安慰同安全感，久而久之，BB都習慣喺媽媽身上獲取安全感，常常黐著媽媽。無論媽媽行去邊，BB都會跟到實一實，有時會令媽媽感到好困擾，一想去廁所或廚房，一旦將BB拒諸門外，BB就會喊得好淒涼。但若然強行要媽媽抑壓抱BB嘅欲望，媽媽又會擔心BB誤認媽媽唔愛自己，而令親子關係受損。

Photo from Shutterstock

3. 羨慕冇孩子嘅生活但又好享受現有嘅親子生活

有時會好羨慕身邊冇孩子嘅朋友可以隨時去旅行、打邊爐、睇戲、打機⋯⋯自己有時都會好嚮往呢啲娛樂活動，但一諗到呢啲活動唔太適合年紀尚小嘅孩子，或冇時間去做，就會好自然打消呢啲念頭。雖然冇咗好多個人娛樂，但係每日放工返到屋企，見到孩子笑著擁抱自己、同自己玩，就會覺得親子娛樂都一樣令自己好開心！

Photo from Shutterstock

Text：Mami Editorial

Photo Source： Shutterstock