電費好貴？夏天必睇 開冷氣6個慳電貼士

最近天氣轉熱，呢幾日都有成30°C，相信唔少人已經開始開冷氣。喺屋企「嘆冷氣」當然爽，不過收到電費單時，就肉赤啦！今日就同大家分享一啲慳電嘅方法，慳錢之餘，又可以更環保，一定要學下嘢！

1 變頻式冷氣更慳電

市面上嘅冷氣機分為變頻式同定頻式兩款，變頻式冷氣嘅轉速可變動，一開冷氣，通常會以超高功率運轉，令室溫快速下降，當室溫達到預設嘅溫度後，壓縮機就會開始減慢轉速，持續以該頻率運行。而定頻式冷氣，就只能夠以最高耗電量模式運行，壓縮機會時開時停，調節溫度。消委會曾經做過測試，用14部1匹分體機進行比較，最後發現變頻式相比定頻式冷氣機足足慳多4成電！

Photo from Shutterstock

2 避免畀陽光直接照射冷氣機

冷氣機安裝喺咩位置，咩角度先最涼，其實亦係一大學問。如果將冷氣機安裝喺陽光可以直接照射到嘅地方，唔單止會影響到冷氣機嘅散熱效能，同時亦會消耗更多電力。因此，冷氣機應盡量安裝喺通風、接觸唔到陽光嘅地方。

3 冷氣+風扇 效果更佳

好多人覺得開咗冷氣，再開風扇，會好嘥電，但其實係相反。同時開冷氣加風扇，可以增加空氣對流，加快降溫。如果覺得唔夠涼快，不妨試下開埋風扇，比起調低幾度冷氣，更加有效同慳電。

Photo from shutterstock

4 定期保養 事半功倍

大家千祈唔好懶，保養功夫做到足，絕對可以幫你慳到唔少電。建議每隔兩個星期就清潔隔塵網一次，避免灰塵阻礙氣流運轉。另外，亦應定期安排師傅上門檢查及進行維修，延長冷氣機壽命。

Photo from shutterstock

5 善用睡眠模式

人嘅體溫喺瞓覺嘅時候會下降，如果冷氣太大，會感覺特別凍，更容易病。唔少冷氣機都設有睡眠模式，開啟依個模式後，冷氣機嘅溫度會定時提升，咁樣唔單止可以慳電，仲可以瞓得更舒服，唔怕會凍醒。

Photo from shutterstock

6 閂總掣最穩陣

相信好多人都知，想啲電器更加慳電，最好就係熄埋總掣兼拔去插頭，冷氣機都一樣。如果只係用遙控熄冷氣，其實冷氣機仍然會處於備用模式，所以喺轉季停用冷氣嘅時候，最好就係熄埋總掣。

Text：Mami Editorial
Source：消委會