【復活節好去處】4大親子活動推介 放電玩足全日

復活節就到啦，大家諗好帶小朋友去邊玩未呢？如果今年冇打算外遊，留喺香港都一樣唔怕悶呀！今次就為大家介紹4大復活節好去處，吃喝玩樂、動靜皆宜、室內室外應有盡有，快啲趁住復活節，同小朋友一盡情放電啦。

1 海洋公園 11歲以下免費入場

海洋公園推出咗「港人獨家優惠」，凡購買成人門票即送小童門票。由即日起至5月1日，香港居民只須於海洋公園入口處出示有效成人門票及香港身份證，即可免費獲贈小童門票1張。不過要注意，持免費小童門票係需要由年滿15歲或以上嘅香港居民陪同入場㗎。如果想一家大細齊齊入園暢玩一天，就絕對唔可以錯過呢個「買大送細」優惠啦。

Photo from 海洋公園網站

Photo from 海洋公園Facebook

2 自助餐 小童免費

復活節想同埋小朋友去食自餐，又怕佢哋食得少，唔著數？富豪九龍酒店推出咗一個復活節自助餐「買大送小」優惠，顧客只票憑酒店網頁嘅電子優惠券，惠顧自助午餐或自助晚餐，每位以正價付費嘅成人，可攜同一位3-11歲之小童享免費優惠，並可以任飲汽水及橙汁，而每位小童更會獲贈《快手廚師》桌上遊戲一份。有得食，又有禮物收，大人細路都開心！

詳情：

Photo from 富豪九龍酒店官方網頁

Photo from 富豪九龍酒店官方網頁

3 黃金海岸尋蛋樂園

每逢復活節，小朋友一定最期待「尋蛋遊戲」。今年，青協有機農場就舉辦咗獵蛋尋寶遊戲，將「隻隻有獎」嘅「復活蛋」散落喺農田之中。大家可以同小朋友一齊挖掘尋寶，一嘗做農夫嘅滋味。另外，活動仲有太陽能稻草人製作工作坊及有機農耕體驗。享受親子樂之餘，又可以順道親親大自然，一舉兩得！

Photo from 青協有機農莊網頁

4 嘆住冷氣睇Baby Shark

除咗室外活動，大家仲可以選擇留喺室內，嘆住冷氣睇音樂劇。喺兒童界非常受歡迎嘅歌曲Baby Shark，將會喺4月20至21日，於九龍灣舉行全港首個Baby Shark音樂劇。屆時仲會將全個鯊魚家族搬到上舞台，同小朋友一齊開海底Party。鍾意Baby Shark嘅小朋友千祈唔好錯過啦！

Photo from 快達票網站

Text：Mami Editorial
Source：海洋公園、富豪九龍酒店、青協有機農莊、快達票