download MamiDaily 親子日常 app
咩係婚姻嘅真諦? 細水長流婚姻需要3個忍耐

咩係婚姻嘅真諦? 細水長流婚姻需要3個忍耐

家庭關係
By rachel.lo on 16 Apr 2019

當二人決定攜手步入婚姻嘅殿堂,意味著兩人從此成為一體,亦係共同走向餘生嘅親密伴侶。然而,長久嘅婚姻關係中少不免會面對著各種意見分歧、爭吵、誘惑嘅時候,有時甚至會令其中一方感到無力前行而有離婚嘅念頭。細水長流嘅婚姻固然人人稱羨,但想要維持呢段美好嘅婚姻關係絕對需要靠雙方努力,正所謂「愛是恆久忍耐」,想好好珍惜對方嘅話就應堅持以下3個忍耐。

ShutterstockPhoto from Shutterstock

1. 雙方脾性

大多數伴侶都會有一個有趣現象,通常一主動一被動、一外向一內內,互補不足。或者自己就係被對方唔同於自己嘅氣質所吸引吧!不過「相見好,同住難」好多夫妻到婚後先發現,兩人嘅性格唔同有時亦會引起唔少小爭執,有時甚至會覺得受唔住對方嘅脾性!想維持恆久婚姻,就要明白婚姻就好似跳舞一樣,時進時退,雙方都需要共同為對方作出改變同遷就,慢慢發展出一套適合大家嘅舞步,喺往後漫長嘅婚姻生活中,都會感到相處得舒服自在。

ShutterstockPhoto from Shutterstock

2. 生活習慣

兩人本喺唔同背景、環境下長大,好多生活習慣都全唔一樣,婚後同住有時亦難改兩方既有嘅習慣,男方或嫌女方經常霸佔廁所太耐;而女方亦會嫌男方打掃唔夠仔細,好多小事或會令愛情一點一滴磨滅。想令婚後愛情歷久如新,雙方要適量忍耐對方嘅一點小習慣,若然真係太難以接受,亦應同對方講出自己感受,給予對方時間改變,而自己亦應接受對方批評,而唔係只要求對方迎合自己去改變。

ShutterstockPhoto from Shutterstock

3. 誘惑試探

婚後二人嘅生活慢慢形成一種習慣、模式,久而久之變得平淡。如果喺呢個時候有異性向自己示好,心中少不免會懷念起戀愛嘅感覺,希望再一次經歷心動。面對新相識嘅異性主動進擊,而伴侶懵然不知仍每日依舊同自己閒話家常、體貼照顧自己,喺呢個時候不妨撫心自問:「值得為一次激情,而放棄深知深交相愛多年嘅愛侶嗎?」

ShutterstockPhoto from Shutterstock

想守護好自己苦心經營嘅愛情、唔傷害深愛嘅另一半,作為理性成熟嘅成年人,應斷然拒絕所有誘惑試探,正所謂「君子不立危牆之下」,任何時候都應提醒同避免自己同異性有任何唔合理嘅獨處,大多數人出軌被發現都會以「對方太主動」、「無法忍受對方挑逗」等等嘅藉口,但若然自己堅守底線,異性絕無法乘虛而入吧!

 

Text: Mami Editorial

Photo Source: Shutterstock

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道