身體未復原又要湊B餵奶做家務 5句激嬲產後媽媽說話

經歷完十月懷胎、分娩、照顧初生BB，產後媽媽可以話係闖過一關又一關，身心都變得非常疲憊，當聽到以下呢句說話，會非常唔開心！

Photo from Shutterstock

1. 你咁少人奶食唔飽阿B梗係喊啦！

一心餵BB飲母乳，但經常聽到旁人用質疑嘅聲音去迫使自己餵奶粉都會感到好大壓力，況且人奶唔係話想擠幾多就幾多，而且初生BB嘅胃容量非常細小，每次都係少食多餐，隨著慢慢長大，食量先會慢慢加大！而初生BB經常哭喊亦係非常正常嘅事，可能係因為餓、受驚、冷熱等等，唔能夠全怪係媽媽奶水唔夠嘅問題。

Photo from Shutterstock

2. BB瞓你就瞓啦！

坐月嘅媽媽理應多休息，但唔係話想抖就隨時有得抖！冇陪月冇工人冇媽媽奶奶幫手嘅媽媽咩都係一腳踢，除咗每隔1、2個鐘要餵一次奶，仲要食飯做家務，根本BB瞓嘅時間就係自己要做嘢嘅時間！

3. BB塊面咁多粒粒，梗係你陀B嗰陣亂食嘢！

邊個媽媽唔想自己個BB皮光肉滑，但係初生BB好容易會有各種皮膚問題，如濕疹、奶癬、口水疹、頭泥等等，都係由唔同成因、甚至冇原因而出現，未必關媽媽陀B時嘅飲食事㗎！

Photo from Shutterstock

4. 一陣有好多親戚上黎探BB呀！

產後媽媽淨係照顧BB都已經夠忙，仲邊有時間招呼客人？雖然知道大家係想為BB送上祝福，但媽媽實在太攰，加上媽媽疲態盡現，冇時間整理自己嘅儀容，真係唔太方便見客，可唔可以唔好打擾媽媽同BB住呢？過咗12朝先探都唔遲呀！

Photo from Shutterstock

5. 我生完BB冇人幫都係咁湊、做家務！

聽到呢句說話都覺得對方真係好勁、體力很好啊！但每個媽媽嘅體質、產後情況都唔同，可能有人覺得媽媽要請陪月、要人幫手湊係好矜貴、唔捱得苦⋯⋯ 不過如果有條件去令媽媽身體恢復得更好嘅話，又點解要為難自己呢？

Text：Mami Editorial

Photo Source： Shutterstock