【BB防蚊】迎接夏日 爸媽防蚊大作戰 BB防蚊產品點揀好？

夏天最令爸媽頭痛嘅，莫過於係帶BB出街，好易被蚊叮到全身都係痕癢嘅小紅點，睇見BB用力周身搲，爸爸媽媽都會好心痛，但係防蚊產品中，最有效喺出街時預防被蚊叮嘅蚊怕水，又會有有害化學物質或會危害到BB，究竟應該點揀適合BB使用嘅防蚊產品呢？

Photo from Mamidaily

1.含10%以下DEET成分

BB用嘅產品成分當然愈天然簡單就愈好！不過要留意市面上好多有效驅蚊劑都含有DEET（避蚊胺）成分，不過呢種成分容易引發起過敏反應，如皮疹、水泡、令皮膚及黏膜受刺激、呼吸困難等。香港衛生署網頁標明6個月以下嘅BB唔應該使用含DEET嘅驅蚊產品，而6個月以上嘅嬰幼兒亦應盡量使用低於10% DEET成分嘅驅蚊產品。

Photo from Mamidaily

2. 只含天然驅蚊成分

除咗DEET成分外，市面上亦有好多聲稱成分天然，可畀2個月以上嬰幼兒使用嘅驅蚊劑，其中茄紅素亦係另一種有效驅蚊嘅成分，另外亦有好多新興嘅驅蚊產品表示含香茅油、檸檬桉、藍膠桉等成分可達驅蚊蟲嘅功效，雖然成分天然，但爸媽仍要留意包裝上有冇指明可畀幾多個月齡嘅BB使用。

3. 以唔接觸皮膚為佳

好多爸媽都覺得蚊怕水直接噴喺皮膚上，驅蚊效果更佳，但畢竟BB皮膚幼嫩又容易敏感，加上驅蚊產品亦未必將所含嘅香料、化學成分、防腐劑等一一列明喺產品包裝上，所以為免引起BB嘅皮膚刺激，喺選擇防蚊產品上，應優先選擇唔會直接接觸到BB皮膚為佳，市面上亦有好多防蚊手帶、驅蚊貼、防蚊扣等，亦會較適合嬰幼兒選用。

Photo from Mamidaily

4. 持久度

所有驅蚊產品都係以氣味驅趕蚊蟲，但當氣味逐漸消散，驅蚊效果就會大大減弱，所以爸媽喺選購驅蚊產品時，亦要留意效果嘅時限愈長愈好，一黎可省卻金錢，二黎可避免玩得太盡興而忘記補驅蚊產品而被蚊猛叮，三黎如噴蚊怕水，可減少噴灑次數避免過度刺激皮膚。

5. 家中用物理性驅蚊產品為佳

除咗出街受蚊叮困擾，如屋企居住樓層較低都較易有蚊蟲飛入屋，襲擊熟睡中嘅BB！除咗開冷氣外，爸媽亦可選購窗紗、BB床蚊帳等，多層保護令BB瞓得舒服。

Photo from Mamidaily

Text: Mami Editorial

Photo Source： Shutterstock