小被被係BB最心愛嘅寶物 研究：可緩和焦慮同不安 轉移對媽媽依戀

無論係瞓覺、睇電視、坐小馬桶，BB總愛攬住小被被？當爸媽拎起BB張小被被，好多時都忍唔住眉頭一皺，全因小被被四隻角都被咬到變色穿窿、仲有一陣口水味，愛乾淨嘅媽媽好多時都會忍受唔住而默默扔小被被去洗。點知發現小被被唔見咗嘅BB即場喊到好淒涼，究竟喺BB心目中，小被被有幾重要？

Photo from Shutterstock

原來BB依戀小被被，喺心理學上又叫做「安全毯現象」。有啲BB喺出世後6個月內，會選出一樣「過渡物體」黎取代暫時唔喺身邊嘅媽媽去獲取安全感。

而小被被同毛公仔柔軟、舒適、溫暖、有自己熟悉嘅氣味，好多時都會被BB選中為「過渡客體」，當自己感到不安緊張嘅時候，可以藉著攬或咬小被被同毛公仔緩和情緒。

Photo from Shutterstock

隨著BB長大，媽媽會逐步放手去俾BB自立，同媽媽接觸少咗嘅BB會逐漸轉而依戀小被被，尋求心靈上嘅慰藉。

好多大人亦偏愛小時陪住自己長大嘅小被被，因為小被被唔只代表著回憶，亦係安全感嘅來源，所以即使小被被已經殘舊不堪，都唔捨得丟咗佢或洗走熟悉嘅氣味。

Text: Mami Editorial

Source：The Guardian

Photo Source： Shutterstock