頭蝨易傳染！小學爆發兩星期 仲未停止擴散

位於坪洲嘅聖家學校爆發頭蝨問題，由3月中旬至今已有10幾個學童染上頭蝨，至今仍未停止擴散，人心惶惶。

頭蝨係一種只可以寄生喺人體頭部嘅細小寄生蟲，常見於頭髮，特別係喺耳背或頸後近領口嘅毛髮，有時亦會喺眼眉或鬚間出現。如果仔細檢驗，可以喺患者嘅髮根發現頭蝨卵。而頭蝨卵同頭皮屑最大嘅分別係，頭蝨卵一般係白、黄、褐或灰色，表面光亮，呈橢圓形，並緊附在髮幹上，唔似頭皮屑咁容易掉下。

Photo from Shutterstock

據衛生防護中心指，最常見嘅病徵係頭皮發癢，過度搔抓會令頭皮出血或損傷，因而增加皮膚感染嘅機會。

頭蝨嘅主要傳播途徑係透過頭部同頭部直接接觸，因為頭蝨只會爬行，而唔可以喺頭髮間跳躍或飛行。另外，患者共用梳子、帽子或頭飾等個人物品亦有機會受到感染。任何人士都有機會染上頭蝨，然而患者多為幼童，因為喺玩嘅時候，佢哋多數會跟同伴有緊密接觸。

最好嘅預防方法係避免同患者有親密接觸，唔好同其他人共用梳子、帽子、頭飾、毛巾或枕頭等個人物品，同埋最緊要係要保持良好個人衞生啦！

如果懷疑自己感染頭蝨，當然即刻睇醫生啦。按照醫生嘅處方，使用藥性塗劑或洗頭水以殺滅頭蝨。最好使用密齒梳子清除頭蝨卵，髮刷、梳子、帽子及被服等個人物品，都要即刻用熱水同清潔劑徹底清洗。

Text：Mami Editorial
Source：衛生防護中心