又轉季啦！葉翠翠分享6個有效減輕濕疹方法

近期天氣又濕又乾，極度唔穩定，相信有濕疹問題嘅讀者一定好煩惱。前港姐冠軍葉翠翠原來曾經幫老公打敗濕疹，呢日佢就同大家分享擊退濕疹嘅方法，究竟點樣先可以有效地減低佢復發嘅機會、甚至斷尾呢？

講到濕疹，相信好多人都有呢個問題，原來香港小姐冠軍葉翠翠同佢老公都係過來人！葉翠翠指以前一年四季都會出濕疹，一般只有指甲咁上下大細，而佢老公雖然只係轉天氣先會出，不過範圍就比較大。

葉翠翠認為，濕疹嘅成因除咗外在因素，如天氣、空氣等，更重要嘅主原係身體內在潛伏嘅「濕熱毒」。作為過來人，佢明白出濕疹時有幾辛苦。對付濕疹係一個長期鬥爭，佢就唔建議搽類固醇，除咗治標唔治本之外，仲有機會有副作用。5、6年前，佢試過用完類固醇後，令到眼皮撕裂，影響上妝，繼而影響工作。

翠翠話比起老公，自己算係小兒科，因為老公出濕疹嘅範圍比較大，有次嚴重到影響儀容。不過佢哋就已經搵到斷尾方法，除咗食保健品外，日常生活都有好多嘢要注意。大家記實以下6個翠翠分享嘅擊退濕疹大法啦！

1. 開抽濕機
翠翠指每日都會開抽濕機，廳同房都一定會開，度數較到最低。不過，當佢囝囝入房時，就會關咗佢；當佢哋唔喺房間到活動時，又會開返部抽濕機，保持乾爽。

2. 留意飲食
好多人為咗減少濕疹「發」出嚟，都會戒食海鮮等嘅食物。不過，翠翠就話原來食蛋、辛辣食物同高糖嘅食物都會有影響㗎。翠翠強調戒口並唔係完全唔食，只係減少進食嘅次數。

3. 搽潤膚液
沖涼後，要搽一啲body oil或者潤膚液，保護皮膚。

4. 留意成份「羊脂」
選擇潤膚液嘅時候，記得要避過「羊脂」呢一種成份。冇錯，呢種成份係好保濕，但係會令濕疹爆發，如果有用緊嘅話，最好都係停用啦。

5. 衣服質地
挑選衣服質地都好重要，唔好買一啲粗糙嘅衣物，避免直接磨擦，傷害皮膚。

6. 性質溫和日用品
洗衫嘅時候，最好用一啲冇刺激性嘅洗衫液；沖涼嘅時候，都一樣要揀温和不傷害皮膚嘅浴沐露或者番梘啊。

以上幾個貼士只能夠作為參考，始終每個人嘅皮膚類型、生活習慣都好唔同，未必人人啱用。如果濕疹情況好嚴重，記住去睇醫生問專業嘅意見啦。濕疹要斷尾，需要用好多心機時間，一步一步擊退佢！

Text：Mami Editorial
Source：葉翠翠 ＠Facebook