爸爸媽媽湊小朋友 雖然辛苦但最享受呢5個樂趣

為人父母係就係冇咗私人時間，做咩去邊都要諗咗小朋友先，雖然係冇咗好多本身嘅娛樂，但呢個世界係好公平，有咗BB之後嘅生活，同樣充滿好多全新嘅樂趣同歡樂，有啲小確幸真係只有父母先會感受得到！

1. 將BB裝扮得非常可愛

以前就只係執靚自己個人就得，但而家就會將全部心思都花晒喺小朋友身上，每次帶小朋友出街、慶祝節日等，媽媽都會悉心將小朋友打扮得好好睇睇，唔只自己睇到好滿足，當出街好多人大讚BB好可愛、著得好靚嘅時候，BB都會好開心咁笑到手舞足蹈，一副好得戚嘅樣，直情覺得自己係最受歡迎嘅存在，連媽媽都會覺得自豪又好笑。

2. 同BB影到靚相

爸爸媽媽最想紀錄低BB所有第一次、唔同嘅趣怪表情，當捕捉到BB難得嘅一刻，或影到一張笑得好靚好甜美嘅相，爸爸媽媽都會興奮得互相分享同欣賞，無論隔咗幾耐都好，都會耐唔耐開出黎睇下，甚至用黎做手機、電腦wallpaper。

3. BB津津有味食媽媽精心炮製食物

每個媽媽都會好著緊小朋友健康，食落口嘅樣梗係自家製作最健康、最啱小朋友口味！無論係小饅頭、麵包、粥粉麵飯、點心、甜品、果汁⋯⋯媽媽都會慢慢儲有自己個人食譜，廚藝愈黎愈精進！當見到小吃貨食得津津有味，食完都搶住個碗唔肯俾返媽媽，絕對係媽媽入廚房嘅最大動力！真係不枉媽媽咁精心炮製美食俾BB啊！

4. 同BB玩時BB笑到卡卡聲

見到BB笑絕對係爸爸媽媽每日最期待見到嘅畫面，爸爸媽媽一得閒絕會施盡渾身解數同BB玩，當見到BB笑到卡卡聲停唔到，呢種魔性嘅笑聲亦會令爸爸媽媽感到被療癒，BB開心爸媽就更開心！

5. BB經常攬攬錫錫爸媽

自己最疼愛嘅萌萌小朋友成日走過黎攬錫自己，真係無論幾忙、幾攰、心情幾差都好，都會即刻甜返晒！係父母最大力嘅強心針！

Text：Mami Editorial

Photo Sources：Pinterest