香港麻疹肆虐 2名女嬰確診！媽媽必睇「中招」症狀＋預防方法

近日麻疹襲港，截至昨日（26日）下午經已有25宗確診個案，其中包括2名11個月大女嬰。

麻疹除咗喺香港有擴散跡象之外，衞生防護中心指近期留意到全球多個國家正受麻疹再度爆發的影響，包括一啲鄰近本港嘅熱門旅遊區，如日本、韓國、台灣等。如非必要，最好盡量避免去一啲麻疹高發地方。不過，如果最近有計劃帶埋小朋友出國旅遊，記住留意以下幾點。

香港衞生防護中心指，麻疹係一種由病毒引起嘅高傳染性疾病，可以透過空氣中嘅飛沫或直接接觸患者嘅鼻喉分泌物而傳播，從出疹前4天至出疹後4天內可將病傳染畀其他人。

防疫注射係最有效預防麻疹嘅方法。如果近日有計劃前往一啲出現麻疹爆發或高發病率的地方，應該喺出發前最少兩個星期，向醫生諮詢有關接種疫苗嘅意見。

而衞生防護中心發言人提醒，懷孕婦女、計劃懷孕嘅婦女同埋本港未滿1歲仍未適齡在『香港兒童免疫接種計劃』下接種麻疹、流行性腮腺炎及德國麻疹混合疫苗嘅兒童，若對麻疹沒有免疫力，不應前往爆發麻疹的目的地。

除此之外，仲要保持良好嘅個人同環境衞生、盡量保持室內空氣流通、打噴嚏或咳嗽時，一定要掩着口鼻，並立即洗手，同時亦都要妥善清潔使用過的玩具和傢俬。

假若不幸受感染，應該立即求醫。患者初時會發燒、咳嗽、流鼻水、眼紅及口腔內出現白點。3至7天後皮膚會出現污斑紅疹，通常會由面部擴散到全身，維持4至7天，亦可能長達3星期，留下褐色斑痕或出現脫皮。出疹後的4日內不應上學，避免將疾病傳染給未有免疫力的人。

Text：Mami Editorial
Source：衞生防護中心