同BB邊玩邊做運動消脂！ Coffee自創12分鐘親子瑜珈操

好多時做咗媽媽之後，掛住湊仔冇晒私人時間，唔好話同朋友出街，連做運動嘅時間都冇啊！不過唔緊要，近日靚媽林芊妤（Coffee）教大家做一套12分鐘嘅親子瑜珈操，各位媽媽唔止可以瘦身減肥，同時仲可以陪住自己嘅BB，一舉兩得！

呢一set親子瑜珈操係用BB嘅體重嚟做負重運動，做之前一定要留意以下幾樣重要事項！Coffee指一定要留意BB頸部嘅承托力，如果唔係BB會好易扭親。另外，唔好喺BB食得太飽或者想瞓覺嘅時候做，唔係就會有嘔奶或者扭眼瞓嘅情況出現。最重要嘅係要量力而為，唔係就會適得其反㗎啦！

事不宣遲，即刻開始～

1. 媽媽盤膝而坐，捉住BB腋下嘅位置，然後曲手擘，並將BB抱起，再放返落地下。 （總共做10下）

2. 媽媽雙腳著地，將BB放喺膝頭上，一定要確保BB坐得穩陣。然後將上身向後挨，背脊要直，然後慢慢向前傾，再拉向後。（總共做20下）

3. 將BB放喺大腿上，媽媽捉住BB嘅手仔，然後將腳慢慢升起，形成一個V字，並維持10秒！休息幾秒之後，做同樣嘅動作，今次將腿部提起嘅同時，要將BB拉近自己。（總共做10下）

休息10秒後繼續。

4. 媽媽瞓喺瑜珈墊上，雙手捉住BB腋下嘅位置，將腿部放喺BB嘅大腿位置，雙腳外八字型咁托住BB，然後以S字型路徑咁轉動BB。（總共做20下）

5. 同樣姿勢，將BB舉高，再放落嚟。（總共做10下）

休息10秒後繼續。

6. 媽媽繼續瞓喺瑜珈墊上，將BB放喺右腳，彎曲膝頭，媽媽將手固定喺BB腋下位置，然後將左腳升起伸直，再打開，做20下，然後換邊繼續。（每邊20下，總共做40下）

7. BB坐喺媽媽肚上面，頭部拉起望著BB，雙腳慢慢打開。（總共做20下）

8. 媽媽將腿部放喺BB嘅大腿位置，雙腳外八字型咁托住BB，然後以S字型路徑咁轉動BB。（總共做10下）

休息10秒後繼續。

9. 媽媽坐直，雙腳曲起，BB企喺媽媽肚上。然後媽媽捉住BB腋下嘅位置，並將BB抱起，再放低。（總共做20下）

10. 媽媽企起身，將BB緊抱喺胸前，然後媽媽將腳打開，腳趾指向外。盡量將腳打開一啲，然後慢慢坐落去。（總共做20下）

11. 媽媽前後腳企，右腳踏前，屈曲90度，將BB放喺上面，慢慢壓腿，做10下，然後換邊繼續。（每邊10下，總共做20下）

同BB一齊做呢套消脂減肥操真係好唔容易㗎！12分鐘好似好短，不過見到Coffee全身爆汗，就知同BB一齊做運動真係好有成效。同BB一齊做運動唔止可以減肥，見到Coffee同Baby Chak全程都笑得咁開心，就知道佢哋嘅關係又更進一步啦！

媽媽們，要記住同BB一齊做運動之前，要清楚了解自己同BB嘅狀態係咪適合運動，同時亦都要量力而為，唔好勉強啊！

Text：Mami Editorial
Source：Coffee林芊妤 @YouTube https://youtu.be/wDrqDnIfvcc
Photo Source：Coffee林芊妤 @Instagram & YouTube