帶BB剪頭髮 連星級髮型師都搞唔掂？ 新手媽媽吳雨霏：好考技巧

想BB或者小朋友坐定定剪頭髮真係一件好困難嘅事，相信各位爸爸媽媽都一定有同感！

日前，歌手吳雨霏（Kary）就分享咗佢帶囝囝Asher去剪頭髮嘅經歷。9個月大嘅Asher第一次剪頭髮，媽媽Kary當然搵個星級髮型師幫手啦！原來就算幾有經驗都好，只要BB覺得不安、驚恐，星級髮型師都無從入手！

圖中可見，Asher由爸爸Brian抱住，BB安靜又乖巧咁挨住喺爸爸膊頭度，原來佢已經瞓著咗！Kary解釋，囝囝原來好驚剪頭髮，驚到完全剪唔到，要等Asher瞓咗，先可以動刀。要幫熟睡中嘅BB剪頭髮真係唔簡單，難怪Kary都話真係「好考技巧」，真係要畀個like髮型師啊！

及後，Kary又再上傳咗一張頭髮碎嘅相，留言指「Bye Bye baby hair」，向囝囝嘅頭髮道別。相信今次成功為Asher剪頭髮，真係令Kary放下心頭大石啊。

新手媽媽Kary自從生咗Asher之後，基本上將所有時間陪住囝囝成長，亦不時會分享初為人母嘅感受。Kary表示每天早上，都會同囝囝Asher一起望出窗外，睇吓外面嘅風景。自從囝囝識坐後，佢每日都會指住窗外唔同嘅事物，向囝囝介紹呢個世界。

而每當有黃色巴士經過，Kary就會同囝囝講：「你看！是yellow bus!」，每次見到呢架yellow bus， 囝囝都會非常非常興奮，不斷笑同埋跳舞！Kary指，自己經常都會諗：「究竟這個9個月大的人仔在想甚麼呢？他眼裡什麼都是美好的，看到yellow bus經過都那麼開心！小孩子就是天真無邪可愛。」

睇住囝囝每日不斷長大嘅Kary有點感觸：「Asher你知道嗎，在我眼裡，你臉上的笑容才是世界上最美的風景。」相信所有媽媽都一定認同呢句話！

Text: Mami Editorial
Photo Source: ngk @Instagram