做咗媽媽先知自己嫁得好唔好 每個媽媽都希望另一半做到呢10件事

每個媽媽生下孩子後，先會知道老公究竟係神隊友定係豬隊友，如果老公可以做到以下呢10樣嘢，絕對會令媽媽大呼自己真係嫁咗個好老公呀！

1. 自動自覺湊BB

一講到湊BB嘅工作，大家總會諗到媽媽，而事實上一聽到BB哭喊，媽媽總會第一時間衝去照顧BB。但係湊BB實在有太多工作要做，媽媽好多時都會有忙到做唔切、攰到癲嘅情況！但如果老公可以幫手將BB湊得妥妥貼貼、安撫BB，還媽媽一個寧靜同休息機會，有一個咁好嘅老公，媽媽真係愛到死心塌地！

2. 主動同BB玩

BB一無聊就會想追住媽媽要求抱抱，或想媽媽同自己玩，如果見到另一半正喺到滑手機，相信媽媽都一定會嬲到頭頂出煙。但如果老公願意放低手上嘅娛樂，轉而同BB一齊玩得開開心心，主動提升親子關係，媽媽見到呢個場面都會覺得好溫馨，亦會鬆一口氣呢個小跟班冇再追住自己，而令自己冇法做家務。

3. 會教導BB學習各種事物

BB要學講嘢、認形狀、認顏色等都需要有一個大人願意花時間去教導，但係媽媽每日要忙於做家務，可以分配到去教BB嘅時間非常短暫，令BB學習效率減慢，如果老公可以幫手教BB，媽媽都會非常欣慰，尤其是見到BB真係學識咗，更會更感激老公！

4. 幫手做家務

除咗湊BB嘅工作外，如果老公仲會幫媽媽手做家務，將家務視為兩人應份去做，而唔只係媽媽一人嘅工作，咁樣嘅老公絕對係愛錫老婆嘅好好先生！

5. 會帶媽媽同BB去玩

放假寧願花時間帶媽媽同BB去搵啱BB又好玩嘅地方，一齊享受家庭樂，而唔係只有自己一個去同朋友聚會。

6. 會花心思氹媽媽

無論係平日或大時大節，都會花心思氹老婆，如買一啲小禮物、暫時放低BB俾親友照顧而兩公婆去食餐好，間中令媽媽離開一下忙碌枯燥嘅生活，好好享受一下美好時光。

7.孝順自己父母

除咗對自己好，老公亦會好關心自己嘅父母，閒時會陪媽媽一齊去探望父母，孝順一下老人家，真正做到愛屋及烏，屋企人都會開心自己個女嫁得幸福！

8. 願意花錢喺媽媽同BB身上

除咗會主動買BB日常用品、玩具、學習用品，亦會買媽媽鍾意嘅物品，唔會只專注喺BB一人身上，令媽媽感到呢個男人總會無時無刻想到自己，愛從來冇改變呢！

9. 識得影靚相

BB每個時刻都值得紀念，所以識得影相嘅老公真係非常吸引！大前提係除咗識捕捉到BB值得留念嘅一刻外，將媽媽都影得靚先抵讚！

10. 常對媽媽表達愛意

做咗媽媽嘅女人都一樣鍾意聽甜言蜜語，一樣想有人氹自己，所以老公們唔好以為老夫老妻就大家心照唔洗講啊！多啲同老婆講「我愛你」啦！

Text：Mami Editorial

Photo Sources：Pinterest