BB驚驚但BB不說 0-2歲各階段BB最害怕嘅事物清單

由BB出世一刻起，由溫暖熟悉嘅子宮去到冰冷陌生嘅產房、原本捲縮嘅身體要躺平喺床上、突如其來嘅聲音、難聞嘅氣味⋯⋯一切都已經足以引起BB巨大嘅恐懼，爸爸媽媽常常都會對於BB忽然哭喊感到莫名其妙，尤其喺晚上，BB常常都會好似好驚慌咁喊，而爸爸媽媽唯一可以做嘅只有抱住BB、嘗試俾BB安全感，希望令BB唔再害怕。究竟有咩會引起BB不安哭泣？有心理學家就整理出以下0-2歲嬰幼兒最常會感到害怕嘅清單：

0-6個月：

1.高分貝聲音

2.突如其來嘅聲響

3.身體忽然失去支撐

4.眼睛望到刺眼嘅光線

較細嘅BB好容易會對外在環境感到害怕，如聲響、光線等，所以如果BB好似去到某個地方特別抗拒，爸爸媽媽不妨帶BB離開一下； 如果BB被聲響嚇到，爸爸媽媽可以抱抱BB安撫一下，只要俾到足夠安全感BB，隨著BB長大，就會慢慢對呢啲刺激冇咁恐懼。

6-12個月：

1. 面對陌生人

2. 去到一個全新嘅地方

3. 沖涼

呢個階段嘅BB開始會認人，識得區分熟悉同陌生嘅面孔，對於唔確定嘅人物同環境會感到不安，所以好多時爸爸媽媽會見到BB好似好唔自在、好緊張嘅模樣，總係依偎住爸爸媽媽，唔敢離開半步。而有啲BB曾經有過被水入眼耳口鼻嘅唔愉快經歷，或沖涼水試過太熱或太凍，都會令BB好抗拒沖涼。

1-2歲：

1.受傷

2.威嚇言論

3.去廁所

BB開始知道受傷會痛，有過痛苦經歷後下次會小心避免令自己再次受傷，爸爸媽媽亦可以稍微鬆一口氣。而呢個階段嘅BB會由爸媽嘅語氣、聽得明句子嘅意思，會知道大人喺到鬧自己、恐嚇自己，如：「唔要你喇！」、「唔錫你喇！」等，信以為真嘅BB會驚到喊出黎，所以千萬唔好衝口而出講出呢啲傷害BB心靈嘅說話。另外，當BB開始要進行如廁訓練，但曾試過便秘嘅疼痛同戒片嘅唔適應感都會令BB感到非常害怕不安。

Text：Mami Editorial

Photo Source：Shutterstock