8個月女嬰被因哭喊被父猛烈搖晃 保住生命但失去半邊大腦 「奇蹟女孩」長大後模樣令人非常感恩

喺2012年，一個叫Cheyenne嘅8個月大女嬰，因為哭喊不斷而被狠心嘅爸爸猛烈搖晃，一夜之間由一個精靈可人嘅BB女慘變成「嬰兒搖晃症」嘅嚴重受害者。

「嬰兒搖晃症」係指嬰兒因受到無數次來回猛烈快速搖晃而令腦部受到傷害，引致失明、癱瘓、抽搐甚至死亡嘅後果。

Cheyenne嘅媽媽Amy悲痛表示，當晚突然接到一個電話，話自己嘅女兒已經冇呼吸、冇心跳，根本冇任何語言文字可以形容到媽媽當下嘅痛落心情！有邊個會估到自己只係將BB女交俾老公個半鐘，就會將大家嘅一生都完全改變；更令Amy勢估唔到嘅係相知相交咗10年嘅老公，竟然可以對自己嘅親生骨肉落毒手。

「我唯一可以做嘅只有不停喊、發抖、嘔吐，祈求上天可以俾我用生命去將我最愛嘅女兒換返黎⋯⋯當我被直升機送到醫院嘅時候，睇到女兒全身被繃帶包住，周圍都係針筒，而佢雙腳都變成黑色、全身浮腫⋯⋯」身為媽媽，見到自己嘅心肝寶貝變成咁，Amy坦言彷彿全個世界都崩塌。

對女兒造成無可挽救嘅畢生傷害，Cheyenne嘅爸爸被判20年有期徒刑，但有15年緩刑同5年假釋，而媽媽Amy亦決心離開呢個竟狠狠傷害女兒嘅老公。

之後，Cheyenne做過好多次手術，腦部亦被切去一半，奇蹟咁保住性命。

上天亦非常眷顧Cheyenne，喺日子一日一日過去，Cheyenne喺媽媽同醫護人員悉心照顧下開始康復過來，終於展現出笑容。

時至今日，Cheyenne嘅外表同一般小女孩無分別，但係曾遭受巨大傷害嘅佢仍要面對種種後遺症，如癲癇、右腿無力等，但慶幸Cheyenne仍積極面對生活。

媽媽Amy希望透過自己囡囡嘅故事話畀大家聽嬰兒搖晃症嘅嚴重性，千祈唔好因為自己一時貪得意好玩或憤怒而猛烈搖動脆弱嘅BB，因為絕對有可能造成無法彌補嘅可怕後果。

Amy亦勸喻大家，當BB失控尖叫哭喊，爸爸媽媽唯一應做嘅係好好安撫BB，亦唔好隨意將BB交俾任何人去照顧，因為你永遠無法想像他人會對BB做出咩事。

好感恩Cheyenne能夠變返一個精靈可人嘅小女孩，希望爸爸媽媽將BB帶到呢個世界後，都能夠用愛去克服同適應BB對生活帶黎嘅所有轉變，令呢類悲劇唔會再發生。

Text：Mami Editorial

Photo Source：Keeping up with Cheyenne Facebook