【就到預產期 媽媽最擔心胎位移去邊】

有左魚B之後，除左嘔，一直都平平安安咁渡過，不過到孕後期兩次產檢都有新鮮事⋯⋯

魚B預產期係2月19號，岩岩係農曆新年初四，其實喺34週魚媽懷疑穿水入左院，駁機CHECK魚B心跳見到我宮縮而住左幾日，宮縮係因為我好緊張魚B會早產...所以要比醫生開鉗檢查(痛)

嗰幾日我不斷摸肚同BB講"你唔好咁快出黎呀，未夠期呀，你咁細粒無得番屋企架"
好彩魚B無咁快標出黎，而我就番屋企休息，唔敢周圍去。

到36週喺醫院做B鏈球菌測試，收到通知竟然中左，醫生吩咐我如果一穿水，見紅要快手入院打抗生素針，因為驚BB會受感染。

平平安安到38週1(2月6號)去私家到產檢，眼見自己已經論盡到同隻河馬一樣，個鼻大過成龍，都問下醫生，係咪就生得，醫生話BB頭仔未落晒盤，應該無咁快，同預產期差不多。

醫生順帶一提我，BB面向同我同方向，即係咩呀 ?
睇下圖：
"顏面位"算係胎位不正既一種，產檢完我塊面黑晒。一心想順產，依家話可能產程好長唔得再剖腹產，我真係灰左。明明2星期前產檢都唔係面向外架！魚爸話一日未生出黎都仲會轉位，無得諗咁多。個日我又同肚入面既魚B講，你乖乖地華麗轉身啦！

番到屋企我同自己講，仲有十幾日先到預產期，唯有到時先算啦！

孕後期就咁完左，因為魚B喺2月8號出左世啦~!!!!!!(請留意HEY!魚媽東區醫院生產記)

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Hey!魚媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： info@mamidaily.com，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！