【曾經產後抑鬱 心入面傷口令自己遲遲打唔開呢個話題】

HEY魚已經一歲，呢一年好忙好攰過得好快，初初喺呢到打BLOG一直都話會講產後抑鬱既事，但就係打唔出，因為心入面，仍然有個傷口，我打唔到呢個話題。

今日我可以打呢個話題，證明我已經渡過左難過既日子，但打到呢到..我眼框已然有眼淚想流出黎...:(

早幾篇提及過，我係無請到陪月，又無長老幫手，產前有出現焦慮情況...對於一個新手媽媽，身體、心理上都好大轉變。

初生BB既密集時間表，相信所有媽媽都好有共嗚，如果無人幫手頂更，基本上係唔需要諗休息！

坐月魚爸拎左假期陪我，有佢做左陪月成個月，已經好幸運。到第二個月，開始隔日自己一個照顧24小時(有時婆婆黎一陣陪我)...

起初我都覺得自己可以應付，但第一個月我成日喊，因為覺得自己唔識照顧BB...同埋成日好擔心...但後來我發覺自己開始有問題。
當我自己一個同BB獨處我就會喊，佢一扭計喊我就開始失控，覺得好無助。有時候婆婆一番左屋企，個種不安同無助好強烈。到半夜，精神唔夠再加上BB既喊，就更無助...

我一直好努力隱藏自己既不安，諗住遲D會好D，但有一日因為安排唔到產假後照顧BB既問題，情緒大爆發，喊到完全控制唔到自己。個陣大概產後第3個月去健康院，有份問卷要填，關於產後日常既問題，我一路猶疑應唔應該如實作答，定填晒標準既健康答案，最後我如實咁填，被醫生評估為高危級別。見左2次心理醫生，之後我無再去見，因為我搵方法比自己放鬆。

同時要同自己講，唔可以傷害到bb，不論傾下又好，點都好，起碼都要比人知道。因為好怕有一日會傷害左BB...

其實我大概第9個月先開始慢慢覺得好D。

第一魚爸安排好多活動比我...

第二bb大左就會開始有互動，唔係剩係喊，不過始終24小時全年無休照顧BB，而BB又唔係乖乖好湊個種，個種困獸鬥真係好辛苦。

不過BB愈來愈大呢種不安同無助會減弱，雖然佢依然係咁惡攪(由其食飯時間) XD

真心建議大家有咩產後情緒問題，一定要搵人幫或者搵朋友傾，
又或者好似我咁，去街，唔好成日留喺屋企，出去睇下BB野，分散注意力。隱藏自己既情緒只會愈來愈迷失，當心理唔健康，又點照顧好BB？

另外，如果你係爸爸、婆婆、奶奶、朋友...請你地多多留意媽媽產後既情緒，有時媽媽好小既舉動可能係向緊你地求救。
有懷疑既媽媽可以睇下以下網頁:
https://www.fhs.gov.hk/tc_chi/health_info/woman/14750.html

輔導服務及熱線
香港撒瑪利亞防止自殺會
2389 2222
生命熱線
2382 0000
社會福利署24小時熱線
2343 2255
醫院管理局精神健康專線 (24小時)
2466 7350
其他
衞生署家庭健康服務24小時資訊熱線
2112 9900
衞生署母乳餵哺熱線
3618 7450
衞生署24小時健康教育熱線
2833 0111

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text：Hey!魚媽媽
Photos： Hey!魚媽媽 & Shutterstock

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！