在職媽媽餵母乳無懼8大外來因素 堅持信念令BB得到最天然嘅營養

近年餵哺母乳普及化，唔少媽媽都想比最天然嘅營養比BB，當然希望餵得幾耐得幾耐。同時有好多媽媽產後都需要復工，在職媽媽要保持住餵母乳其實更為艱難，因為往往都有好多外來因素影響媽媽堅持嘅信念，實情係辛上加辛。喺非正式統計下，普遍在職母乳媽媽都有以下嘅辛酸：

1.擔心奶量跌

絕大部分母乳媽媽復工後最擔心就係維持唔到奶量。而奶量嘅多少其實都取決於媽媽嘅情緒，當媽媽情緒壓力大，身體過份緊張、唔夠放鬆就好容易會令到奶量暴跌。除左壓力會影響奶量，泵奶時間唔定時同樣都會影響到奶量，不過有好多工種都唔一定方便到定時泵奶，媽媽唯有自己食返多啲上奶食品、飲多啲水。

2.擔心乳腺塞

正如好多工種、工作時間都唔一定方便到媽媽定時泵奶，例如工作行唔開、要開會等等，好多時泵奶時間遲咗好多。當兩次泵奶時間分得太開，好容易就會谷奶。如果谷到溢奶，身體就好容易有個錯誤訊息以為唔需要咁多奶，身體就會慢慢調節，變相就會減產。加上如果谷得太耐，輕則媽媽會有石頭胸、有刺痛感覺之後，重則會令乳腺阻塞、乳腺炎。

3.無適當泵奶空間

香港餵哺母乳係近年先普及化，所以唔係每個工作場所都有適當嘅泵奶空間。但同時就係在職母乳媽媽嘅擔憂之處，好多時都只可以等待食飯時間先可以借用到房間泵奶、要遮遮蔽蔽咁係位泵。如果唔係只能夠去洗手間解決，但因為廁所細菌實在太多，好多時媽媽泵完都唔敢俾BB飲，富媽媽當然可以留比BB沖涼，但窮媽媽就要擔心唔夠量比BB飲。

4.擔心如何存放母乳

每個母乳媽媽都知道滴滴皆辛苦，每滴母乳都好珍貴，所以一定會遵從安全存放母乳嘅指引。但唔係每個在職媽媽工作嘅地方都有雪櫃，無的話媽媽就要自備一個保冷能力強啲嘅冰種同冰袋。即使有雪櫃，但同事亦有機會擺放生嘅食物、又或者會亂移動存放好嘅母乳。唔怕尷尬嘅媽媽唯有係存放器皿上寫明「母乳」、「不准移動」等字句。

5.工作效率減慢

如果係啱啱復工，奶量唔多又想繼續餵母乳，就只能夠泵嘅次數多啲、密啲，但即係要工作中途行開幾次。如果工作量多，就會好似做極都做完咁，效率就會減慢。

6.受到同事嘅白眼

雖然大部分同事都會知道自己係放完產假，但佢地唔會知道你係餵母乳，所以當你行開去泵奶，唔知情嘅同事就會以為係走咗去偷懶。就算係知情嘅同事，如果佢地唔係同路人的話，當你每日都不時就消失一段時間，就會好容易令同事覺得有不公平對待。

7.每日手袋都好似石頭咁重

作為泵媽，出門一定要帶齊奶泵、配件、冰種、奶袋。每樣嘢都唔重，但咁多樣加埋就好重！媽媽每日就好似擔泥咁返屋企，仲要萬一帶漏一樣都好大件事。所以每次出門、返屋企前都要再三檢查。

8.唔夠瞓

放工除左要湊BB之外，仲要處理好未完成嘅工作。就算完成好嗰時，都已經得返好少時間瞓覺。半夜係造奶嘅高峰時間，好多母乳媽媽都會特登半夜起身泵奶，務求造多啲奶同維持到奶量，所以瞓到一半就要起身，泵奶搞一輪先可以再去瞓。

雖然過程艱辛，但係為咗小朋友嘅健康，作為媽媽一定要為母則強，撐過去就知道一切辛酸都只係浮雲。

Text：Mami Editorial

Photo Source： Shutterstock