餵奶粉都係好媽媽！ 奶粉媽媽同樣全心全意努力照顧BB 想BB好

餵母乳嘅好處，個個媽媽都知道，但事實上，亦有好多媽媽基於身體狀況或職場處境而選擇餵奶粉，然而好多時都會被人問：「點解唔餵母乳？」令奶粉媽媽們有時會內疚自己令BB冇人奶飲。

其實，好多奶粉媽媽一開始都希望餵哺母乳，只係好多時因意料之外嘅事而無奈轉用奶粉， 如： 奶量唔夠而BB體重不斷下跌、產後因身體不適而要服用需要停餵母乳嘅藥物、工作環境同性質唔允許媽媽餵哺母乳⋯⋯各式各樣嘅原因令媽媽喺衡量BB最大利益嘅情況下，選擇放棄母乳餵哺，改用合適嘅配方奶。

當有人問：「點解唔餵人奶？餵人奶好好㗎喎！」好多時奶粉媽媽會默不作聲，將委屈都吞落肚，然後安慰自己唔需要理會人哋講咩，最緊要自己知道點樣係對自己、BB同家庭最好就得！

除咗餵奶上嘅分別外，奶粉媽媽都同母乳媽媽一樣，要全天候照顧BB、餵奶、掃風、沖涼、換片⋯⋯全心全意為BB付出。

當母乳媽媽擔心塞乳腺、奶量跌嘅時候，奶粉媽媽同樣有自己嘅煩惱，如BB同食開嘅奶粉唔夾而容易便秘、轉奶粉又怕BB難以適應、用開奶茶又怕唔適合BB體質⋯⋯各有各難處。

而且奶粉亦唔係萬惡嘅毒藥，亦係非常適合BB嘅食品，同樣可以好好養大BB，長大後都唔會同人奶BB有太大分別，所以奶粉媽媽們唔需要有罪疚感，大家亦唔需要比較母乳媽媽同奶粉媽媽邊個較偉大，只要喺自己能力範圍內能夠做到最好、將最好嘅俾到BB就夠喇！

各位媽媽要加油啊！

Text：Mami Editorial

Photo Source：Shutterstock