餵母乳偶爾為媽媽生活帶來小小困擾 母乳媽媽慣常擔心7件事

對母乳媽媽而言，能夠堅持餵母乳係一件值得自豪嘅事，但係喺餵母乳嘅過程中，媽媽經常會有好多小煩惱，常常都會擔心以下7件事：

1.食藥唔餵得奶

媽媽最希望BB食母乳可以健健康康，但係如果媽媽不幸生病，要食一啲有機會透過乳汁被BB吸收到有害成分嘅藥，媽媽就必須要暫停餵呢批奶俾BB，令BB喺短期內改為食奶粉，好多時都會令母乳媽媽感到內疚。但值得注意嘅係，並唔係食藥就一定唔餵得母乳，只要係睇醫生嘅時候講明自己係母乳媽媽，請醫生盡量開一啲可以繼續哺乳嘅藥就冇問題！

2.奶泵壞咗

奶泵有好多小配件，唔單只喺清洗上有啲麻煩，當唔見咗一個小配件／導管入咗水就會令奶泵唔能夠順利運作，令泵媽手足無措！不過就算冇咗奶泵，媽媽都唔可以令BB捱肚餓，唯有試下改為埋身餵BB，甚至改用手擠乳汁！（其實有時手擠會更有效率，只係手會好攰。）

3.食咗退奶食物

好多時媽媽並唔會清楚晒食咗邊啲食物會退奶，好多時食完見奶量跌咗先知，然後就會好愧疚，唯有再努力泵密啲、泵耐啲再去追返奶量⋯⋯

4.BB出牙咬媽媽

出咗牙仔嘅BB有時用錯方式吸吮，或口痕故意咬一咬媽媽個乳頭，都會令媽媽痛不欲身啊！

5.倒瀉奶

媽媽都希望滴滴皆辛苦嘅奶可以一滴不漏咁完全落晒BB個肚度，一旦唔小心倒瀉咗，媽媽個心都會好似滴緊血⋯⋯

6.塞乳腺

忽然個乳房有硬塊，又熱又痛，點泵點推都唔散，個人仲有少少發燒嘅感覺，媽媽都會自認倒霉遇到乳腺阻塞，有母乳媽媽甚至形容呢種痛簡直比生仔更難受⋯⋯當幾日都維持呢個狀況，媽媽都會好有心理壓力，擔心會唔會嚴重到要去醫院放膿⋯⋯

7.奶滲出乳墊

有時忙起上黎，冇辦法喺既定嘅時間內排清乳汁，好多時乳汁會自然滲出黎，如果乳墊移位或吸唔晒漏出嘅乳汁，好容易會發生乳汁滲到外衣嘅情況，令媽媽非常尷尬。

Text：Mami Editorial

Photo Source：Shutterstock