【母親有感 當大情人遇上小情人】

【母親有感 當大情人遇上小情人】

Bloggers 專欄
By kylife on 14 Mar 2019

「女兒係爸爸既前世情人(小情人)、兒子係媽媽既前世情人(小情人)」

以上依句相信大家都會成日聽到,依句說話好多時會用係爸爸同女兒之間既關係,但身為現實中既大情人(老婆或老公)心情又會係點呢?首先我生既筋肉寶寶是囝囝,所以我會以我作為媽媽照顧囝囝既角度去睇

大情人係由一開始就陪係自己身邊既人,而且無大情人根本唔會有小情人既出現,只不過媽媽同小情人之間既連繫早係確認懷孕就已經開始,經過懷胎十月無數次只有兩個人的互動,心情上的確已經有變化。

好似我自己從無諗過做媽媽之後會有咩變化,不過BB出世後發覺自己對佢既重要性,當下母愛就湧出嚟,到宜家大情人成日見到我母愛氾濫,特別係餵奶同埋BB主動攬埋嚟既時候。

上面驟眼睇落好正常,只不過問題出現啦!!

最近大情人一直投訴我整個人心思都放在小情人身上,完全無理過佢感受!

我諗唔少媽媽都面對過上述既指控,但實際上盡心盡力24小時Standby照顧好小情人係100%出自媽媽既天性同本能,亦都可以講因為最近真係唔少慘劇發生,所以自己緊張都係情有可原;而另一方面,小情人根本未到能夠以言語表達感受既時候,所以媽媽給予適切既回應都係應該嫁!不過我講完依個答案,大情人依然唔太滿意。

雖然大情人不斷投訴,但我知佢一樣好愛鍚小情人,每次小情人一對住佢笑,佢係即刻勁開心!而且我知道小情人慢慢長大會開始想同爸爸玩,到時候爸爸出動玩具攻勢,我相信小情人會即刻衝上去,所以麻煩大情人宜家比媽媽好好享受同小情人相處既時光,而實際上我都好想講「其實我真係好享受宜家同小情人既互動!所以大情人請先別呷醋呀!」

==============================

Text & Photos:kylife

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

Follow Instagram: MamiDaily


Share to Facebook