日本親子廁所竟令媽媽們唔敢用？ 全因設計太令人尷尬 網友：完全想像到接落黎會發生咩事！

當爸爸媽媽獨自帶BB去玩，人有三急起上黎抱住個BB去廁所總會覺得好唔方便！眾所周知，日本係一個非常貼心嘅國家，某啲地方會設有親子廁所俾帶著嬰幼兒父母使用，原意係就係好，不過有日本嘅Twitter網友貼上一間親子廁所嘅內部相片，即使引起唔少父母熱烈討論，紛紛表示見到呢個廁所真係完全唔敢用！

親子廁所內有一個專為5個月至2歲半嬰幼兒而設嘅座位，等父母可以安心將BB放上座位後盡情大小便⋯⋯然而喺呢個座位嘅旁邊，竟然係緊急呼叫鐘！令網友們都笑爆表示：「感覺小朋友坐上去之後，會聽到緊急鐘會不停響叫！」、「隔住個屏幕都聽到聲！」等等，竟然將緊急呼叫鐘設置喺小孩伸手可及嘅位置，小編個腦已經幻想到小孩會開心不停拍打緊急掣！

亦有網友貼相顯示自家女兒坐上去後令人汗顏嘅一幕，相中嘅女兒正伸手想去玩弄緊急掣，想像到呢位網友應該係喺非常驚險嘅心情下去完廁所⋯⋯呢張相一出，旋即惹黎更多媽媽嘅共鳴，表示確實經歷過孩子撳緊急掣後有工作人員急趕過黎嘅尷尬經歷，只好當場道歉逃走。

有網友更分享，有啲嬰兒座位設喺門口隔離，小孩隨時可以喺父母去緊廁所時打開門，令外人睇哂父母如廁情況，危險指數爆燈！

其實呢個親子廁所嘅原意係好，希望日本有關方面會收到家長們嘅寶貴意見，改進一下設計～！（笑）

Text：Mami Editorial

Photo Source： Pinterest