【BB要健康】分娩過程應安全至上 剖腹產BB亦能健康成長

有好多媽媽可能會覺得順產對BB好，即使明知順產會辛苦，好危險，非一般情況都堅決順產。瑜珈媽媽鍾麗淇Margaret最近喺電視節目談及生BB嘅事，憶述自己當初因大囡健康問題，需要緊急開刀，而過來人身份提醒媽媽：「開刀唔等於你唔係一個好媽媽！」

今年42歲嘅鍾麗淇喺2011年剖腹產誕下大囡Isabella，喺38周時，醫生指囡囡喺肚內停止生長，需要緊急開刀，即使原初Margaret係想順產，但聽完醫生建議後都決定以BB健康為首，剖產誕下大囡。

Margaret指，身邊好多朋友會因為自己剖產質疑自己「覺得自己唔係順產，所以唔係好媽媽。」但Margaret鼓勵媽媽們，其實唔需要畀太大壓力自己，分娩過程應安全至上，即使剖腹產嘅BB都可以健康成長，同順產BB無分別。Margaret喺2015年產下2囡，囡囡都係剖腹產，啱啱過完3歲生日，同姐姐健康成長。而節目中嘅另一主持陳敏之，就指自己因為太驚順產出現嘅突發情況，覺得自己心理質素差，所以都係決定開刀，BB宜家都健健康康！

Margaret能夠堅定指「好媽媽唔係以開唔開刀嚟決定」係因為Margaret同大囡嘅經歷，Margaret比任何媽媽更知「媽媽的力量」嘅道理。

喺2010年同男友拉埋天窗後，隔年就生下Isabella，但囡囡半歲時被證實患上罕見基因病「四號染色體缺損綜合症」，因而令手腳軟弱無力，Margaret逐漸退出幕前，專心湊囡囡。囡囡嘅罕見病發病率係5萬分之1，Margaret坦言見囡囡喺4歲時，仍唔識叫媽媽，曾經覺得好崩潰，但係佢知道自己必須堅持下去，要陪女兒度過難關「一個人遇到問題，可以選擇逃避，可以選擇打仗，我選擇要去抗爭，我根本唔可以崩潰。」

慶幸Isabella慢慢康復，喺7歲時學識用助行器行路，Margaret指，可能好多人會覺得Isabella需要特別照顧好可憐，但其實囡囡真係無敵，佢係我嘅驕傲！大家唔使用可憐嘅心態對待特殊兒童，佢哋比一般人更堅強，而囡囡令我覺得自己變得更成功。

Text：Mami Editorial

Photos：鍾麗淇@IG