10樣嘢話你聽到底係爸爸媽媽眼中同小朋友眼中有咩分別？

望住小朋友由乜都唔識到慢慢有自己諗法，係身邊睇見佢地嘅一舉一動，有時佢地嘅行為會令爸爸媽媽百思不得其解，諗唔明點解佢地會咁做／咁答／咁理解。

甚至當有呢種爸爸媽媽諗唔明嘅行為出現，就會令到爸爸媽媽好嬲、鬧小朋友。但其實爸爸媽媽曾經都係小朋友、曾經都有過呢段懞懞懂懂嘅時候，只係人大咗、接受嘅教育多咗、理解能力又高咗，先會反過來覺得小朋友嘅行為有問題。但當爸爸媽媽仲係小朋友嘅時候，其實爸爸媽媽對呢個世界同樣充滿好奇，亦係以最純真嘅出發點去解讀世界，以下10個例子就等爸爸媽媽回顧一下小朋友嘅世界，從而去學習由小朋友角度出發。

1.男孩子嘅世界就係當佢地推住架玩具模型車，不停「轟～轟！」 咁拉前拉後、拉前拉後就以為自己真係揸住架跑車。

2.女孩子嘅世界就係當佢地著起裙，就會自動進入童話國度，幻想自己就係城堡入面嘅公主。

3.每個小朋友眼中零食就係佢地嘅正餐，日常所需要嘅營養通通都可以喺裡面搵到。

4.每個小朋友都特別有音樂天份，一見到啲杯、碗、餐具，就好似見到一set鼓咁，不停敲啊⋯⋯打啊⋯⋯

5.永遠屋企張梳化／凳都好似有針拮咁，每個小朋友坐落去都好似如坐針氈咁坐唔定～

6.每次見到爸爸媽媽張床，佢地就會雙眼發光～係彈床啊！

7.除左音樂、運動細胞之外，每個小朋友都總係有埋藝術天份，比一堆畫紙佢地都唔夠，一定要張「牆」紙咁大先夠佢地畫！

8.小朋友頭髮長得特別快，但剪頭髮就係一樣極困難嘅事，因為佢地會無限放大髮型師手上個把較剪，唔講會以為髮型師拎個把係大菜刀！

話雖如此，小朋友的確係有過人嘅想像力，爸爸媽媽有時係會追唔上小朋友嘅思路，就會認為佢地好頑皮、點解講極都唔聽。甚至爸爸媽媽有時會嫌小朋友嘈吵、痴身，又或者覺得自己無教好小朋友就等於好失敗。但係小朋友眼中又係唔係咁呢？

9.點解小朋友有咩疑難都會搵爸爸解決？就係因為爸爸係小朋友眼中就係超級英雄，超級英雄就可以解決一切問題！

10.有時候媽媽可能會覺得小朋友好痴身，行開一步都好困難重重，其實全因媽媽對小朋友黎講⋯⋯就係一切～

只要當爸爸媽媽願意喺小朋友嘅角度去望呢個世界，就會明白佢地並唔係頑皮，只係佢地太純真，有無窮嘅創意，同⋯⋯精力。

Text：Mami Editorial

Photo ：Shuttershock