BB愈做愈興奮 3個原因解釋點解要重複做

BB學識行後開始周圍拎嘢玩，更會時不時 嘢，當聽到媽媽話：「唔好掟呀！」BB好似會愈嚟愈興奮，不停重複動作！原來BB不斷做重複嘅行為係有原因㗎！

1.得到大人注意 獲得喜悅感

BB喺做依個重複嘅行為時，通常一開始都係隨機發生，但BB之所以繼續再做係因為能夠從中獲得快樂。例如當BB拎起遙控器，要抌落地下時，爸爸媽媽都會心急大叫：「唔好呀！」BB就會覺得爸爸媽媽反應好得意，而且令到爸爸媽媽將注意力集中喺自己身上，得到好大滿足感，所以就會不斷重複要抌遙控器。即使得到負面回應，BB都會覺得能夠立即吸引爸爸媽媽注意，所以不斷重複動作。

2.從中探索新事物

大部分2歲前嘅小朋友都鍾意不斷做重複行為。其實係因為小朋友喺2歲前嘅認知發展處於「感覺動作期」，需要具體接觸事物從而加深認知能力。有時小朋友不斷敲擊物件，係因為BB發現原來敲唔同物品會發出唔同聲音，覺得好神奇，所以其實BB學?新嘢呢！

3.滿足成就感

BB嘅能力不斷發展中，除咗透過大人教識自己外，就係靠自己慢慢發現。當BB唔小心成功做到一啲事情後，就會因為發覺自己具有某種能力因而感到有成就感，所以就會一做再做，例如重複推跌積木，因為BB覺得自己能夠疊高積木好叻，所以推跌後再置過。但由於BB鍾意向別人展現自己新能力，所以通常同一行為唔會重複太耐，因為BB又要發掘新目標呢！

所以當小朋友不斷重複一啲行為時，若果唔係危險情況，唔洗立即制止，先冷靜處理，唔需要畀太大反應，細心留意BB重複動作嘅原因，究竟係引人注意定還是有新事物吸引到小朋友呢？

Text：Mami Editorial

Photos：Shutterstock